新年快樂！八方在此祝大家新一年，平平安安，少啲風波，而去年對貴為政協副主席嘅前特首梁振英嚟講，相信都係好年，皆因涉及佢嘅UGL案，律政司竟然以唔夠證據而唔起訴，盛傳佢喺2022年捲土重來再跑馬仔，如今甩身，會唔會入閘機會再增？觀乎佢去年不停喺facebook就個人關注議題或個人醜聞發炮或消毒，似乎再戰味極濃，八方問過兩位喺fb同佢交手嘅「紅」人點評689復出意見，行李門一役擊敗他的逆權空姐吳敏兒一句好啱聽，直接叫689「慳番」！
梁振英2016年被踢爆疑向機場員工施壓，迫令國泰職員「特事特辦」代送幼女梁頌昕嘅手提行李入禁區，空勤人員總工會理事吳敏兒不滿此舉有違乘客同行李需同行同檢嘅一貫做法，提出司法覆核，法院去年8月裁定空姐勝訴，點知689唔忿氣，事後多次喺fb發文否認有特權，仲批評興訟係政治行為。
fb狙擊政敵係「不甘寂寞」
「再回應佢，都係多餘。」逆權空姐喺689發帖批評後曾隔空喺fb還擊，但其後冇與對方糾纏：「我覺得再應佢都係多餘，佢有失自己身份，我唔會同佢癲囉。」前特首以fb向政敵狙擊，吳敏兒斥對方自暴其醜：「你唔需要喺fb追住一個人不停咁樣質問，我覺得同佢嘅身份唔係好對稱。」又諷刺梁旨在惹人關注，對付不甘寂寞嘅人應該「唔好理佢」。雖然被689同五毛狙擊，但佢覺得值得，因為空姐擊敗689，令唔少港人吐一口烏氣。
因為企硬舉行香港民族黨召集人陳浩天嘅演講，FCC都被689盯上，喺fb針對FCC嘅租約出擊，慫恿政府唔好再平租畀FCC呢個佢心目中嘅「播毒」平台；FCC前執委Francis Moriarty發帖點出689嘅失實指控。Francis批評689未搞清FCC租約條文、基本營運就急急發帖棒打FCC，但被揭發搞錯後竟然唔修正同道歉，反而轉移視線同焦點。
如果689復出，兩位又點睇？吳敏兒叫佢「可以慳番」，話689最好繼續以政協副主席身份「貢獻國家發展」，「香港就留番畀其他人啦。」Francis直情唔信中央會畀689再選：「梁振英不是習近平選擇！」加上梁離任特首前民望極低，如今已係國家領導人，唔信689再選。
李八方