張小姐同家人上個禮拜六（29日）喺港鐵東涌站對開巴士站搭B6線去港珠澳大橋香港口岸，點知坐上驚慄十分鐘嘅巴士旅程，佢見到車長由開車到總站全程右手控軚，左手傾電話吹水吹到鬼咁開心。張小姐兩次勸對方咁樣好危險，點知車長完全當佢透明。
張小姐嗰日同老公仲有幾嗰小朋友搭B6線巴士，由於人多，佢哋企喺近司機位置。張小姐見到車長用左手揸住電話講，右手揸軚盤，甚至乎轉彎、上斜落斜都冇停過講電話。「我覺得好唔安全，我就同巴士司機講，我話司機你唔好再講電話嘞，你揸緊車㗎！」但對方一於少理，望都冇望過佢，亦都冇反應，繼續講電話。
無視市民勸阻
大概十分鐘左右巴士已經去到香港口岸總站落車，張小姐就攞個電話出嚟影，影到倒後鏡車長揸住電話講得好開心個樣，右手仲控緊軚。張小姐話：「巴士司機佢哋係一個專業，佢哋唔應該攞全車乘客嘅生命安危嚟做賭注，香港越嚟越多巴士嘅意外就係多得呢啲巴士司機！」
張小姐話冇見過車長咁離譜：「我覺得如果你講電話用hands-free，好短時間屋企有緊急事或者點樣，我可以接受，但係你全程用手揸住電話講，我覺得好離譜！」佢質疑咁樣係唔係已經違反咗運輸署條例。不過，張小姐憑以往經驗，覺得同巴士公司投訴，佢哋都唔會作出乜嘢行動，所以索性同《蘋果》講。
佢希望巴士公司對車長嘅操守監管嚴厲啲，給予適當處分，但絕對唔想影響到車長飯碗，佢最擔心係如果司機繼續咁樣嘅話，真係遲早有意外發生！小記向新大嶼山巴士公司查詢呢件事，但係至截稿前仲未收到回覆。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。