新年新面貌，審計署都有新一哥。國務院根據特首林鄭月娥建議同提名，任命朱乃璋為審計署署長，接替已掌審計署6年半嘅孫德基，噚日生效。孫德基2012年上任，當時梁振英政府一改傳統，空降非公務員出身、曾任安永會計師事務所高層嘅孫入政府，出任為政府衡工量值嘅審計署署長，曾惹來批評，而孫任內審計署曾揭露廉署分拆賬單掩飾宴會超支，掀起前廉政專員湯顯明被指亂花公帑等醜聞。
譚允芝入法律改革委員會
至於現年58歲嘅朱乃璋則喺1984年1月加入庫務署，先後任職會計主任職系、審計署審計師、首席審計師、審計署助理署長，2015年7月晉升為審計署副署長。
林鄭讚揚孫德基擔任署長期間盡忠職守，尊重對方退休嘅意願，指朱乃璋有豐富審計專業知識，深信佢能帶領審計署繼續精益求精。
政府噚日亦宣佈，特首林鄭委任咗前大律師公會主席、資深大律師譚允芝為法律改革委員會新成員，任期三年，今日生效。譚允芝曾經盛傳係林鄭推薦嘅律政司司長人選，可惜過唔到阿爺嗰關，但無礙佢喺娥班子擔任公職。