自曼谷返到香港不久，就得知泰國國會通過一項影響力極大嘅法案，12月25日，國會（議員由軍政府委任）在無人反對之下，通過修正1979年嘅麻醉藥品法，將用作醫療用途嘅大麻合法化，得166票贊成，13票棄權，零票反對。法案審查委員會主席頌猜講到：「這是國會向泰國民眾送出的新年禮物。」法案咁容易通過，係因為曾諮詢民意，人民廣泛支持。既得隴，又望蜀，主張大麻合法化嘅人士雀躍之餘，希望將來再進一步將消閒用途大麻合法化。
東南亞國家普遍禁毒，伊斯蘭國家馬來西亞與印尼素來嚴懲運毒品入口人士，泰國有限度將大麻合化法之後，問題嚟嘞，泰國南部與馬來西亞半島北邊接壤，泰馬之間嘅走私活動猖獗，以後泰國大麻私運入馬來西亞，必然為兩國外交製造麻煩。
啱啱泰國老友A有花膠關照，親自送上門，收左丁山優惠價，佢素來同上環西環啲海味店相熟，有好嘢買到，就預埋左丁山一份，認真多謝。於是順便問老友A：「你點睇泰國開放醫用大麻，創亞洲先河？」老友A大笑：「有好多人呢次發達咯，泰國素來執法時鬆時緊，你明白冇？」唔駛畫公仔畫出腸咯，有利益便有人設法得到方便，醫療用與消閒用大麻，邊度會分得咁清楚吖。去蘇梅島沙灘，本地人與遊客，便是好明顯嘅目標市場，將來或有不少人包括香港遊客以後多啲興趣去泰國旅行──食草也。去加拿大及美國一啲州分都搵到大麻，如加州，去到科羅拉多州就比較遠，而且價錢肯定貴。老友A聽見左丁山講到美加大麻合法化，點頭話是：「左丁山你開始搵到泰國大麻醫用合法化嘅背後勢力嘞。泰國北部以前有金三角，種植鴉片，鴉片周圍都禁，全民可改種大麻，市場唔係泰國，而係美國加拿大澳洲等等國家，以後大麻會成為泰國一項龐大出口外滙產品，每年起碼一千億銖。」一言驚醒，泰北地區種鴉片，以往有全國選舉時，泰北選民一面倒投向他信兄妹，現在軍政府想搞一次事先知道邊個政黨贏嘅選舉，推出法案明益泰北，高招也。一位泰國同學告知：現在中國泰國關係融洽，雲南有不少與泰北合作嘅經濟計劃，官方明，民間暗，其中一項就係運鴉片到雲南，之後運到其他地方，用來製造特朗普要求習近平出手打壓嘅醫藥opioid！香港目前仍然禁大麻，年輕人去到泰國，唔好帶啲返香港呀。