「人生有幾多個10年？」人稱「基哥」嘅港鐵車務營運總管（高速鐵路）李聖基，明日元旦起榮休，離開服務29年嘅港鐵，年屆62歲嘅佢先後處理過機場快綫、深圳地鐵4號綫同高鐵等營運事宜，更自揭「基哥」呢個港鐵生招牌出處，源於2015年公佈西港島綫通車消息嘅「基哥手記」。
樂意讓港鐵保留生招牌
原來當時為咗加強同公眾溝通，港鐵決定設計「基哥」呢個角色向市民發放不同車務資訊。其後南港島綫、觀塘延綫都係透過有關手記公佈工程進度，佢笑言「基哥」角色面世後知名度大升，喺街上不時被市民稱呼「基哥」，「開心，好似當你老友記咁」。
多年工作心得，佢話最重要親力親為，憶述西港島綫剛啟用後佢特登搭巴士睇沿線情況，了解市民使用習慣，點知被巴士車長認出，問佢點解唔搭地鐵轉坐巴士？又話每逢颱風襲港，佢會到列車駕駛室觀察行駛情況，9號風球生效，所有露天路段列車服務即時停止，都係經視察後作出嘅安排。至於工作上最唔開心係見到同事被市民誤會，主動提到大圍站古箏風波，有女學生因攜帶體積大嘅古箏而被拒入閘，佢再次澄清誤會一場。
佢指同事按守則處理，想協助女生搵其他交通工具而唔係欺負佢，但當時有人喺車站抗議向職員講侮辱說話，如「有仔就唔好做地鐵」等，佢話同事冇做錯就唔應該咁鬧佢哋。
提到任內最具挑戰工作，佢話係準備高鐵通車。原定兩年前退休亦因此延長留任，最難忘今年8月中高鐵通車前最後階段，佢因為左眼退化需更換眼角膜，被迫告假休息，當時每日與同事以電話溝通，好鬼心急想返公司處理，最終同醫生「講數」，由休息兩個月縮短至20幾天，笑言「開會時都要去洗眼同埋滴眼藥水」。而高鐵通車後香港往潮汕路段因鐵路設計問題，列車喺深圳北站時需掉頭，要等至少20分鐘先能繼續行駛，基哥話近日同內地當局商討，建議現時由同一車長駕駛改為派另一位車長喺掉頭位置先行等待，並由佢接續駕駛，以減少車長需行走至另一面駕駛室嘅時間，如果落實最快明年7月實施。
至於退休後有乜搞？佢話會同太太去日本旅行，並以照顧孫女為樂，希望未來有機會到學校同年輕人分享經驗同交流。至於生招牌「基哥」會唔會一齊「退休」？佢笑指「我係屬於港鐵」，由公司決定係咪保留。
