中聯辦繼平安夜會見駐港中資機構，呼籲佢哋支持娥特施政後，又有新搞作，就係喺網站宣佈元旦日將會正式開設「香港中聯辦」嘅官方微信公眾號，話呢個係西環「門常開、人常在、事常辦」嘅「e服務」平台。記者搜索發現，名為「香港中聯辦」嘅微信公眾號，𠵱家已經可以通過公眾號搜索功能搵到並關注，其ID為「locpgHK」，簡介係「中央政府駐港聯絡辦官方賬號」。
西環就話，呢個微信公眾號上線後，將形成「一網一微」嘅官方新媒體傳播形態，話呢個官方微信公眾號將力求「權威發佈、貼心表達」，通過「微官網」、「微資訊」、「微服務」三個欄目，宣傳「一國兩制」方針同中央對港政策，並為市民提供相關網上辦事服務喎。唔知日後有乜嘢西環治港消息，西環又會否率先喺呢個微信公佈？