一位老友記來電：「你又講曼谷，我睇到網上有你嘅讀者留言，點解你唔教人帶細路返內地玩呀？」吓，返內地駛乜左丁山教呀，大公文匯兩份報紙日日都有呢啲好料啦。左丁山年青年代，正值文革，邊個敢去北京？惡佬明、建築邦年青時，打倒四人幫之後，佢地就同大學、中學同學坐火車上北京，長途跋涉不以為苦，那有今天請大學生坐高鐵去北京咁舒服，但請都未必去噃，咁先至奇。退休後成日返珠三角潮汕找尋鄉土地道美食嘅曾智華，係羅湖常客，佢就對左丁山講過：「喺羅湖過關，多數白頭髮，極少見到年輕人。」咪係囉，自願組團返內地自由行嘅細路，為數不多，有組織嘅就當然有，例如CIS（漢基國際學校）學生讀到中三，就要去杭州上課，故此一啲學生讀完中二就去咗英國寄宿學校。本港官府最高層官員的仔女大部份去英國，唔返中國讀書，叫本地年輕人認識祖國，請由高官家庭言行合一開始。
回到香港，知道台灣閃靈樂隊不獲簽證入境，而入境處嘅理由，令人笑到碌地之餘，不禁嘆息佢地有冇常識、知識。唔講入境處封英文覆函嘞，自有專家馮睎乾嚴正批評佢地嘅三流英文。講理由咪做人肉錄音機囉，你睇鄭若驊司長度假回來，面對記者幾咁老定。左一句法律專業，右一句特別個案不予評論，答咗等於冇答，再來一句「不要將專業法律決定政治化」，你奈佢乜何？但何解入境處竟然唔使用「唔評論個案」呢一招，反而覆信寫明：「申請人須具備在香港不容易覓得的特別技能、知識或經驗」，真係笑死天下人，「奶媽」林鄭睇到恐怕都會鬧呢班入境處劉阿斗。如果咁嘅理由，真係嚴格執行，入境處會唔批准馬友友來港，Lady Gaga、Beyonce或者老人家Paul Anka呢？韓國K-Pop歌星呢？或者夏里信福來港拍戲呢？中國足球隊成績水皮，咪應該禁止入境？林鄭特首高度重視之摩星嶺在白屋由芝加哥大學活化，開辦EMBA課程及派出芝大學者來摩星嶺講學，芝大教授每次來港，要唔要證明佢地叻過港大中大科大啲商科教授先至准嚟？如果有人根據入境處理由去申請法庭禁止芝大教授來港教EMBA，都唔知政府會幾咁尷尬。哎吔，自梁振英精忠報國之後，一國兩制逐年褪色，做官嘅，由屁股指揮腦袋，樣樣學足內地官員，取態寧左勿右，自願做太監，仲急過皇帝，恐怕以後啲亞洲盛事都會在曼谷舉行咯。