周四晚意乙嘅巴勒莫喺主場鬥阿斯科利,最終大勝三球,不過開紀錄一球客隊門將竟然扭波扭入自己龍,真係相當有嫌疑!話說當時阿斯科利門將佩魯堅尼喺小禁區邊接應回傳,巴勒莫嘅前鋒當然上前力迫,呢位門將想「吸停」時,個波竟然碌番入自己個龍。佩魯堅尼擺完烏龍之後立即跪地抱頭,顯得相當驚訝,但係其他隊友就好似冇咩反應咁,唔通劇本一早已經寫好咗?