求驗客手記：12月狂搶15分破紀錄
槌仔幫全面復活

季初陷入連敗困局嘅韋斯咸，喺「工程師」比歷連尼嘅帶領下全面反彈！英超周四晚嘅獨腳戲，韋斯咸就靠巴西中場菲臘安達臣挺身而出省兩粒，作客以2:1反勝修咸頓，12月狂搶15分升上聯賽第9位。

由於傷兵多到數都數唔晒，阿拿奧杜域同查維亞靴南迪斯等都有傷，搞到韋斯咸連七個後備球員都擺唔到，最尾只放到六個後備，當中仲包括辛迪施華同干拿高雲迪呢兩位從未喺英超上陣過嘅小將。兩隊上半場都開唔到紀錄，但下半場就上演入球騷，最尾出現咗三個入波。

靠菲臘安達臣起孖反勝

今場先開紀錄嘅係修咸頓，50分鐘翼鋒列特文射門被客隊守門員法比安斯基撲出，不過佢反應夠快補射，喺門前混戰中鏟射入網，領先1:0。不過三分鐘之後韋斯咸就追平，菲臘安達臣喺禁區頂峨嵋月稍左位置起腳，個波就好似支箭咁直飛龍門左下角入網。相隔短短六分鐘，韋斯咸就反超，真係好有效率。修咸頓一次角球攻勢搞唔掂，變成韋斯咸嘅反擊機會，前鋒米查利安東尼奧快放一段之後傳中，無人看管嘅菲臘安達臣控定個波，再單刀射穿阿歷士麥卡菲嘅十指關，為球隊鎖定2:1嘅勝局。

睇齊熱刺僅輸紅軍

踏入12月以嚟，連同今仗韋斯咸暫時踢咗六場聯賽，攞到5勝1負狂擸15分，同熱刺睇齊之餘，亦只係僅僅輸畀呢個月六戰全勝嘅利物浦。而根據《Opta》嘅數據，韋斯咸喺今個月拎15分，亦係球隊喺英超史上攞分最多嘅一個月。

韋斯咸喺2018年完結之前仍有一場比賽，佢哋下周日會作客近況低迷、近5場聯賽輸足4場嘅般尼，好有機會將呢個隊史紀錄進一步推高。至於梅開二度嘅菲臘安達臣真係着晒火，自11月以嚟就不停有波入，近9場聯賽轟入7球，帶領韋斯咸回勇。