12月17日晚去到曼谷，次早吃早餐睇報紙，知道17日早上8點舉行嘅「環球小姐」競賽，菲律賓小姐Catriona Gray當選，點解競賽要在早上舉行嘅？好多泰國人正在返工塞車途中，邊個會睇電視呀？左太話：「你都未瞓醒，畀亞洲人睇嘅咩，曼谷上午8點，正是美國東部時間晚上8點，美國人睇電視嘅黃金時間呀！」啊，係啦，選美乃美國玩意，由1996年至2015年係美國人特朗普旗下公司擁有嘅，特朗普為咗競選總統，在2015年9月將間公司賣咗，電視直播權亦由NBC轉咗過去FOX，所以雖然為咗搞新意思而將選美大會搬去曼谷舉行，舉行時間仍要安排在亞洲時間早上，選美係一場商業贊助節目，主辦單位點都要照顧美國電視觀眾嘅啫。
後來在FOX電視重播睇番，菲律賓小姐真係靚得交關，當選環球小姐理所當然，佢答題目亦非常自然流利，信心十足，身材樣貌體形風度氣質皆是上上之選，贏我地香港小姐幾條街。但佢嘅樣子「鬼鬼地」，睇落似菲律賓西班牙裔，後來翻查資料，方知佢爸爸係澳洲人，澳洲出生，攞澳洲及菲律賓雙重國籍，長居馬拉，1999年5歲已當選「小菲姐」。菲律賓人好喜歡選美，菲姐贏得環球小姐皇冠，已有前科，今次又贏，自不然轟動菲律賓。或者因為選美在曼谷舉行，最後十名美女入圍爭一姐嘅有四位亞洲人，即泰國小姐、尼泊爾小姐、越南小姐及菲律賓小姐，有少少政治正確意味。
睇「環球小姐選美」，盡視聽之娛，唔知特朗普在白宮有冇睇呢（據報呢位總統只係收睇FOX電視），講真，佢去辦選美好過做總統啦，佢在白宮掛住出Twitter鬧人，搞到股市大亂，對沖基金界畀佢玩死，情願佢常與靚女開Party好過！
國際機構在亞洲搞大型節目，東京、香港、新加坡可能因成本太貴，已失吸引力，台北要顧慮北京反應，馬尼拉不太平，吉隆坡、耶加達伊斯蘭氣氛與西方形式不合，首爾容易招惹示威，去上海北京？中國有意識型態防止美帝文化傳播喎，於是曼谷往往係佳選。泰國雖是佛教國家，估唔到曼谷聖誕氣氛濃厚，各大酒店商場爭相佈置燈飾，盡顯曼谷之開放本色，此外，美食地方甚多，今次在Anantara酒店條橫街，Hansar酒店對面，搵到一間 Chef Man（文苑）粵菜一流，花膠鮑魚汁撈麵食到耳仔郁，甜品集粵菜泰菜特色，非常吸引，唔怪得呢間中菜館雖位於靜寂昏暗橫街豪宅地下，晚晚仍然有大把食客捧場！