三十年前同朋友親人遊曼谷，少不免要做一次導遊，帶人去大皇宮、卧佛寺、雲石寺、皇家田、唐人街、金佛寺以至國家博物館等等。今日呢，冇乜人有興趣去觀光咯，每次到曼谷都係要尋找最新落成商場、新食肆，以至親子活動等等，大概以前購物地點只有一間中央百貨，依家就新場林立，每間各有特色特點，加上BTS轉移交通形式，逼上架空鐵路好過在路上塞車，以前認為遠嘅地區如Asok，如今話咁快就可以到！以前黃創山初創BTS，搞到幾乎破產，依家人人話佢有眼光，好多地產商發達，係拜BTS所賜，二十年來，黃創山嘅BTS直情係泰國最大之財富創造人（Creator of wealth），現在每星期都有曼谷地產在香港促銷，如果唔係有BTS，嗰啲樓點可以賣得出呀，曼谷地面交通之擠塞，鬼都怕！
湄南河西岸之吞武里府（Thonburi），素來比較落後，就係交通之故，雖有幾條大橋過河，塞車情況五十年不變，但有咗BTS，情況開始唔同，地產商瞄準湄南河西岸，不停買地起樓，集中在香格里拉、文華東方對面河，例如半島酒店、Millennium Hilton早已落成，在希爾頓與半島之間，有一個新型大商場Iconsiam剛在11月開幕，宣傳攻勢盛大，左丁山自不然要去行吓。都幾容易去㗎，坐BTS到Saphan Taksin站（香格里拉酒店鄰近），就有免費穿梭船載客過河到達，住在文華東方更有免費酒店船接送，由Anantara酒店去到，大約二十幾分鐘，這個Iconsiam商場地方龐大，商場之後面就係兩座可以「賺大錢」嘅高層豪宅。坦白講呢個商場有齊唔同意大利法國等字母品牌，與Siam Paragon，Central Embassy，Emporium等商場並無分別，但為咗招徠，特別引入日本高檔百貨公司高島屋，佔咗幾層地方！之不過，我哋去東京都未必行高島屋啦，貪佢貴啲咩，在曼谷，高島屋恐怕冇乜大吸引力。反而最有特色，別處所無之特色就係地下設有一個Sook Siam區，Sook即是幸福咁解。區內完全係晚上街頭市集咁款，全國特色攤檔雲集，專售不同食物食品及泰國工藝品，價錢非常便宜，一碗湯河只售50銖，十足街邊價錢，故此區內人山人海，Iconsiam之人流有九成集中喺呢度，幾值得遊客到此一行。不過如此一來，左丁山又立即諗到Iconsiam嘅business model係點？呢個Sook Siam區旺丁不旺財（因售價極便宜），貴價區就冇乜人幫襯，業主發展商都幾傷腦筋也。