「你睇吓，有警察呀有警察呀，你睇吓，警察唔知捉邊個。」前日Boxing Day下晝5點幾，馬先生揸私家車載住一家大細出街，佢同囝囝講完呢句冇幾耐，前面架響住siren嘅鐵馬直撞再前面煞車停燈位嘅寶馬，鐵馬即刻瞓低，交通警亦都碌咗埋路邊攤咗喺地，胸同腳受輕傷送院。
馬先生嘅車cam影低晒成個撞車經過，事發前佢沿住新清水灣道向坪石邨方向落斜，揸開車嘅都知嗰個位出名影快相，然後佢見快線一架響警號嘅鐵馬跟住一架寶馬切線，喺佢架車前面，去到彩雲邨對開燈位啱啱轉黃燈，寶馬急煞車，點知跟住寶馬架鐵馬懷疑收唔切掣撞咗埋去。
馬先生即時落車睇吓交通警有冇事，寶馬司機亦都跟住落車了解同埋報警。馬先生得幾歲嘅囝囝喺車上面等嗰陣，同媽咪講第一次見到有意外發生，仲話警察好可憐。眨吓眼就極速有警察到場調查，馬先生就上返車開車離開。據佢初步了解，原來鐵馬原本係要追寶馬，因為對方切雙白線。
案件有待調查，警方暫時將案列做交通意外有人受傷，28歲姓楊寶馬司機冇受傷，交通警胸同腳受輕傷送院治理。