身兼工聯會會長嘅港區人大代表吳秋北，又再語出驚人！佢前日緊跟大陸路線，喺facebook出po話12月26日係中共前領導人毛澤東誕辰125周年，認為呢日先係「中國人的聖誕節」，仲話最好嘅紀念方式就係「向主席學習！」不過佢呢個歌頌po係喺美帝嘅facebook發佈嘅……可能呢個係中國人嘅愛國方式啦！唔知係唔係知道有人鬧佢將毛澤東「神化」，佢噚日再接再厲再出po「補充」，話歷史上傑出人物，有人將佢哋作為民族象徵或神祇，但係「並不是指他多麼的完美無缺，而是強調他推動、結合歷史發展大潮所作出卓越貢獻」。
吳揪得曾經喺反新界東北社運人士獲判上訴得直後，斥法官是「青年殺手，社會罪人」，引嚟好多「關注」，可能佢真係好鍾意受人關注，所以佢噚日出po時一開始就話，「昨天發貼引來關注暴增，今再補充，和各位共勉！」佢仲好宏觀咁睇，由秦朝講到現代，話中華歷史上下五千年，從三皇五帝到毛主席，各時代傑出人物都係中華民族驕傲，又引用毛主席講話乜乜乜，總之一味歌頌，「從中華民族偉大復興嘅角度看，毛主席更具開天闢地的首創之功，就更為明顯重要，放在整個中華文明史上都毫不遜色！」
潘小濤批毛毒上腦
淨係歌頌毛主席？梗係唔會啦，習大大都有份，唔係點襟撈？吳揪得話，新中國係毛主席周總理等人使其站起來，係鄧小平等人使其富起來，係習近平主席等人使其強起來，仲好肯定咁話，呢啲必定載入史冊，最尾佢仲教大家正確對待偉大人物嘅方式，「有了偉大的人物，而不知擁護、愛戴、崇仰的國家，是沒有希望的奴隸之邦……怎樣看待毛主席，也在考驗中華兒女、中華民族是否有希望！」
吳秋北落tag都落得好足，落埋自己，同三大民族英雄並列，「#毛主席#鄧小平#習近平#民族英雄#中華復興#吳秋北」。咦，講咗咁多歷史，點解漏咗文化大革命害死幾多人、批鬥鬥死幾多人、大饑荒餓死幾多人嘅，唔知聽日佢會唔會再「補充」呢？而對於吳揪得提倡毛主席誕辰作為「中國人的聖誕節」，評論員潘小濤喺fb發文回應話：「佢哋成班根本係毛毒上腦嘅毛左。」
李八方