聖誕節傳統上都係要同身邊嘅親朋好友講聲聖誕快樂嘅，不過瑞典球星伊巴謙莫域同班粉絲嘅祝福就比較另類，而且有少少不雅，就係竟然舉中指向大家問好，唔知第時會唔會創咗一個新潮流呢？
球星聖誕上載慶祝相見得多，不外乎都係好似美斯、恩尼斯達或泰利呢啲，搵埋家人或情侶一齊喺聖誕樹前影相，或者攬實對方咁晒溫馨、甜蜜同歡欣，惟獨一向好有性格嘅伊巴，就喺聖誕節當日與眾不同，喺社交網站上載咗一張舉起中指嘅聖誕小精靈相片。
一日已有百二萬個Like
咪以為伊巴整張咁嘅相出嚟係「撩交打」呀，但鍾意有味笑話或者熟識佢嘅粉絲，就識得欣賞。所以佢班球迷都不知幾受落，短短一日已經有超過百二萬個Like喇，仲有唔少粉絲影番啲中指相畀伊巴㖭！
碧咸親下廚扮大姑媽
另一位可以話係佢師兄、同樣踢過曼聯、巴黎聖日耳門及洛杉磯銀河嘅萬人迷碧咸，今年嘅聖誕節，佢就sell自己係一個住家好男人，喺社交網站ig上載咗切聖誕火雞嘅相，而且絕對唔係呃Like咁簡單，事實上今次嘅聖誕大餐真係佢親自下廚！
碧咸一向好重視同屋企人過聖誕，早前接受一個體育網站訪問，就透露細個嗰陣點樣過聖誕節：「我擁有一個好開心嘅童年，我哋細嗰過聖誕節嘅時候，屋企雖然冇火雞，但爸爸會買一大桶炸雞返嚟慶祝，而媽媽亦會送聖誕睡衣畀我哋，喺平安夜着住瞓覺。」
另外，碧咸又喺ig上載咗一張佢戴住用聖誕樹彩帶製成嘅眼鏡自拍，仲Tag咗有「樂壇大姑媽」之稱嘅Elton John，同呢位音樂界嘅老友講聲聖誕快樂，皆因Elton John之前都戴過同一款眼鏡影相。
