平安夜嗰晚，粉嶺圍村唔多平安，皆因網上瘋傳一段影片，相信係北區區議員兼粉嶺圍村長彭振聲所拍，拍片地點係粉嶺圍村外嘅露天咪錶位，片中人說話夾雜粗口，懷疑因警員抄牌大發雷霆，仲「撻朵」自稱係該村村長兼區議員，「躁男」揚言一定會向警方總區指揮官投訴。嘩嘩嘩，乜區議員同村長就大晒咩？事隔一日，彭振聲終於喺聖誕節（25日）深夜發聲明，就事件向公眾同警隊致歉，但佢強調冇喺警員面前粗言穢語，堅稱係喺警員離開停車場後同村民談話嚟㗎咋喎，但網民就唔多信佢呢個解釋，紛紛叫大家DQ佢。
稱繼續支持警隊執行公務
「怒插抄牌警」事隔一日多，彭振聲25日晚發道歉聲明，話對自己嘅「爆粗兼撻朵」不適當言論同舉動，向公眾及警隊衷心致歉，又話「定當以此為戒，繼續支持警隊依法執行公務」。但佢同時「澄清」，指自己當晚喺粉嶺圍停車場並冇阻止警員抄牌，更加冇喺警員面前「爆粗兼撻朵」，聲稱有關言論係喺警員離開停車場後同村民談話嘅內容。
彭振聲嘅聲明最後仲提到，會積極以正確渠道向政府部門反映停車位不足同交通堵塞等難題，希望解決因停車問題對村民做成嘅困擾同居民關心嘅民生問題，就咁聽起嚟，真係一個好體貼嘅區議員囉。但網民唔多信佢個版本，例如話佢「擘大眼講大講」，明明條片影住佢對住啲警察係咁鬧，質疑佢為咗選票扮跪低；有網民好心水清，質疑指：「精神分裂咩？人（警察）都走咗，撻朵畀自己聽呀？」彭位於粉嶺嘅辦事處噚日公眾假期冇開門；記者嘗試致電彭同佢嘅助理，截稿前未能接通。
李八方