讀者陳先生星期一平安夜下晝3點幾，搭由尖東開往順天嘅26號九巴，佢坐喺巴士上層，巴士去到紅磡漆咸道北近江西街燈位之前停咗好耐，於是走落下層睇吓乜事，見到個男人企喺架巴士前面指手劃腳鬧車長，然後有個男途人睇唔過眼鬧個攔巴士嘅男人，兩人展開罵戰。
巴士上面嘅乘客你一句我一句議論紛紛，佢哋話攔巴士個男人鬧個車長冇停車，但車長就話見唔到有人喺巴士站等車所以冇埋站。個男人突然走出馬路企喺巴士前面。車長、乘客都有報警，有乘客忍唔住爆粗：「呢啲正式仆X嚟，佢𠵱家都唔知喺度似乜嘢，度度都係見到呢啲人！」陳先生亦都話個男人嘅行為唔應該，如果話架巴士冇停車，咪去投訴囉！擾攘咗大約20分鐘，個男人先行返埋一邊。
警方回覆，12月24號下晝大約3點10分，接到一個38歲姓蔡巴士車長報案，話有一個37歲姓黃男人，喺江西街同漆咸道北交界想上巴士 ，車長冇停站，黃先生於是企喺巴士前面，同車長爭執，警察去到現場，將案件列做糾紛，黃先生自行離去。