今個聖誕真係喜上加喜！前香港足球先生、現職傑志助教嘅盧比度（Chino）喺噚日拆禮物日收到份大禮，就係迎娶港人女友Amy，真係恭喜恭喜！
42歲嘅Chino喺2010年嚟到香港加盟傑志，雖然只係短短踢咗兩季就掛靴，但就繼續留喺香港做教練之餘，仲有繼續踢甲組。Chino更加喺香港落地生根，噚日同女友Amy結婚，佢都算比較低調，只係搞咗個lunch party，邀請咗傑志會長伍健、主教練朱志光、總經理吳凱威同一班office嘅職員等等。我求大俠就問Chino點解揀拆禮物日結婚，佢就話：「冇呀，我老婆話想呢一日，咁就呢一日啦！同埋咁啱我細佬呢段時間嚟香港，咁就fit晒喇！」希望Chino同Amy幸福快樂，同埋喺香港繼續教好波啦！
另外，前日聖誕節正日嘅銀牌四強，梁氏兄弟梁冠聰同梁諾恆（箭嘴示）各為其主，點知雙雙傷出。我求大俠噚日都問候咗大佬梁冠聰，佢話前晚比賽完，兩兄弟都有同一家人燒嘢食，而佢兩個傷勢都冇乜大礙，唞一陣就冇事，唔會影響到細佬梁諾恆踢省港盃。但話時話，港隊今日開操，仲未有決選名單，唔通「新教練」想睇真啲先揀人？