蠱惑賊仔買110蚊平嘢做掩飾，趁機偷走700蚊貨品！黃先生喺尖沙嘴加拿分道開舖賣手機配件，前日聖誕節夜晚收舖後點貨，發現少咗兩支錄音筆，於是翻睇店內嘅CCTV，結果發現有個男人喺當日下晝兩點幾嚟買嘢，其間偷走兩支售價合共700蚊嘅錄音筆，店主噚日去咗差館報警。
根據CCTV片段睇到，當時一個孭住橙紅色背囊嘅男人，企喺舖頭門口遞手叫店員出去，佢想買兩個分別10L同15L嘅防水袋，叫店員幫佢攞。佢趁店員喺門口幫佢攞貨嗰陣，行入店入面，好快手咁擸咗一盒錄音筆，收埋喺件衫入面，收好之後仲若無其事撥一下頭髮。跟住店員攞咗兩個防水袋畀佢，總共110蚊，佢照畀錢。
店主：捉到賊薄酬兩千
黃先生話CCTV見到個背囊男畀完錢之後冇即刻走，拎住兩個防水袋喺舖入面繼續睇嘢，然後佢再拎起一盒同佢較早前偷嘅一模一樣錄音筆，望兩眼就詐詐帝夾喺兩個防水袋之間，神不知鬼不覺就偷咗兩支錄音筆走咗去。
黃先生同小記呻，舖頭幾乎日日都有人偷嘢，佢話舖租貴，賊仔偷幾十蚊嘢都算，偷幾百蚊嘢真係唔可以算，所以佢噚日下晝去咗尖沙嘴差館報案，希望警方憑片段可以拉到個賊。為咗警戒啲人唔好再去偷嘢，佢仲話如果有人認到片段入面嗰個背囊男，而且成功令警察拉到個賊嘅話，佢唔介意畀薄酬2,000蚊。
警方回覆亦都證實接到黃先生嘅報案，懷疑有個男人偷咗兩支錄音筆，警察經初步調查之後將案列作盜竊處理，交由油尖警區刑事調查隊跟進，暫時未有人被捕。
爆相爆片
爆相畀$500、爆片送$1,000嘅基本獎賞外，仲會選出每周之星，每星期最高單日總點擊頭5名即刻科水$10,000，而每月15號至翌月14號期間獲得全月最高單日總點擊者，更可以成為每月盟主，額外獎賞$100,000，係$100,000！爆相爆片必須為本報獨家採用，一經刊登立即有獎！
爆相爆片WhatsApp：6383 6568
參加細則
1.爆相爆片必須由參加者拍攝。
2.若本報發現任何造假情況，將取消其參賽資格。
3.壹傳媒集團員工及親屬不可參加。
4.本報會保留採用爆相爆片與否和獎項分配的一切權利，如有任何爭議，以本報決定為準。