沙田一條地下鹹水管噚日朝早爆裂，大量鹹水噴出，仲有成六層樓咁高，猶如噴水池咁，喺聖誕節早上為沙田居民加演一幕水舞間。不過，爆水管導致現場路面水浸，途經嘅車輛都要減速躲避，交通一度受影響。
水柱激射半空
噚日朝早7點15分左右，沙田大涌橋路往馬鞍山方向，近獅子山隧道公路有一條地下鹹水管爆裂，水柱射上半空然後再回落，達到六層樓高。爆水管位置就有積水，附近馬路面亦受影響濕晒，車輛經過水簾幕都減速但仍然濺出水花，現場交通一度受輕微影響。
警方接報到場封路及維持交通秩序，又通知水務署派員到場搶修。水務署發言人表示一條直徑約70厘米嘅鹹水管爆裂，人員喺中午12點半左右到場關水掣進行搶修，附近車公廟站等鹹水供應需暫停。