違例泊車，差人上前抄牌天公地道。不過前晚平安夜晚網上瘋傳一段影片，拍片人喺粉嶺圍村外露天咪錶位對住抄牌嘅軍裝警破口大罵，鬧差人得閒冇嘢做，冇人投訴，又唔阻街，做乜要抄牌，其間粗口橫飛，拍片人更撻朵自稱呢條村村長兼區議員，仲凶差人，話會向警方總區指揮官投訴，不過呢條片曝光後，網民鬧爆拍片人，有人仲將撻朵人起底，懷疑係北區建制派區議員彭振聲。
話會向總區指揮官投訴
呢段長約5分鐘的影片，拍片人一開始先拍攝兩名差人制服上編號，隨即連珠炮發話當時係傍晚6點左右，鄰近港鐵站嘅石湖墟、粉嶺站交通更為繁忙，質問差人呢個時候嚟抄牌做乜，係咪冇嘢做，其中一名差人同佢講嗰度係咪錶位，有不滿可以投訴，但差人未講完，有人即發爛渣大鬧，啲車冇阻街，為乜刻意要嚟鄉村抄牌？又話自己係村長、區議員，有村民同佢投訴，之後越鬧越囂張，語帶恐嚇話佢同差人嘅RC（總區指揮官）講，睇吓佢哋係咪冇嘢做，其間有村民出嚟同拍片人打招呼，叫拍片人做「聲哥」，村民又提及當時係平安夜，拍片人自稱將車泊在瑞柏園附近。
片段曝光後，有網民懷疑拍片人「聲哥」係北區建制派區議員彭振聲，彭振聲亦係粉嶺圍村長、註冊專業土木及結構工程師，2015年當選北區區議員，當時佢報稱是獨立人士，但其實他曾代表民建聯參加區議會選舉，之後退黨。記者嘗試搵彭振聲求證，但佢電話轉駁去傳呼機秘書服務，警方話正了解事件。而網民鬧爆拍片人，仲鬧差人表現軟弱，「點解呢啲土豪牛屎飛氣燄咁大？！正正就係因為警隊裏面嘅管理層、呢條土豪口中所講嘅RC過往嘅龜縮軟弱態度，令呢班人咁囂張。」
李八方