小YY聖誕前放假，左度右度，都係揀咗曼谷為目的地。去年佢放長假，與老公帶女兒去芬蘭搵聖誕老人，今年假期短啲喎，想搵肥仔K去日本，但肥仔K第三個孩子出世冇耐，行唔開，於是冇乜選擇，好似多數香港人一樣，唔去日本就去泰國囉。
左丁山聞訊，去曼谷等於返第二故鄉啫，立即去埋一份，但與小YY夾一夾，佢原來係主要帶女兒去「兒童天地」之類，唯有除咗住埋一間酒店與晚上吃飯之外，其餘活動就各顧各。小YY結果選咗佢童年時代已住過嘅Anantara Siam Hotel（那些年叫做曼谷麗晶），話有「集體回憶」喎，因酒店行出去不遠就係四面佛，四面佛隔籬就係三十年前Sogo（即Amarin Plaza），Sogo好似香港大丸咁，執咗好耐，但地下之「麥當勞」就數十年如一日，屹立不倒，小YY十歲之前，在此留下不少腳毛，故此今趟要帶女兒去懷舊一番，另外，Anantara原來增設一個兒童Playroom，家長可以暫時放低細路交專人看管，自己可以走咗去按摩做Spa，算係諗得周到。冇法啦，呢間本來係純商業酒店，三十年前不大歡迎兒童入住嘅，但現在新商業酒店林立，多到數唔晒，同一條街行三分鐘路程之內就有君悅、華道夫、St. Regis、Hansar同級數商業酒店，競爭激烈到極，加上中國遊客已是泰國旅遊業米飯班主（今年截至12月20日，有第一千萬個強國遊客入境），唔想辦法歡迎強國富裕家庭旅客，就難以爭取新生意咯。
由Anantara所在街道之Rajadamri車站，坐BTS到Siam Paragon，只係一個站，車費16銖，小YY帶女兒去參加兒童天地活動，玩足一日（連三人入場費），只用港幣五百幾蚊，玩乜？咪係畀女兒參加各類不同之「角色扮演」活動，成班十歲以下細路扮時裝表演模特兒行catwalk、扮醫生為病人睇病、扮空中小姐、扮麥當勞店員等等，還有類似hip-hop舞蹈、扮消防員，整個活動設計係誘發兒童認識不同行業，家長要全程陪同，不可以離開，妞兒愛俏，小YY問女兒最鍾意做乜，小女孩話做模特兒，因為有人同佢化裝及搽手指甲油彩喎。左丁山已無童真，問小YY，主辦單位點樣賺錢？小YY諗咗一陣，講：「有sponsors（贊助）啩，扮空中小姐要着AirAsia制服㗎！」咁就明白晒，搵不同公司贊助兒童活動，自小培養未來顧客，有長遠商業眼光也，麥當勞梗係第一個嗒糖肯做sponsor啦！