歐洲大部份聯賽喺聖誕節前夕都歇冬，一班球星都開始放假，同屋企人齊齊過節，兼且喺社交網站大晒幸福。西甲已經歇緊冬，巴塞隆拿隊長美斯就四仔爺着晒父子裝影全家福，而佢嘅宿敵、祖雲達斯前鋒基斯坦奴朗拿度（C朗），亦都有假放可以陪吓屋企人，同女友佐真娜加埋四位仔女齊齊戴住聖誕帽影相，好warm呀。
美斯完成咗上星期六嘅西甲之後就隨即離開西班牙度假，佢太太安東莉娜平安夜就喺社交網站上載咗佢哋一家五口慶祝聖誕嘅靚相，美斯仲同三個囝囝一齊着父子裝㖭，巴塞喺西甲帶緊頭，相信今個聖誕佢哋應該過得好開心喇。至於美斯嘅長年對手C朗雖然已經過咗意甲搵食，但亦都唔執輸，同女友佐真娜加埋四位仔女齊齊戴住聖誕帽影全家福，不過點解佐真娜影相都係唔笑呢？
本田扮聖誕老人陪細路
一家大細過聖誕固然幸福，不過兩個人過都可以好浪漫，好似去咗日本發展嘅西班牙中場恩尼斯達咁，佢就暫時撇甩一對仔女，同老婆兩個人影張靚靚相，享受吓短暫嘅二人世界；今年七月做咗一對孖仔老竇嘅車路士前鋒艾華路莫拉達，雖然今季踢得麻麻，但就同太太喺聖誕樹前深情一吻，sweet到漏。
除咗一家大細或二人世界外，原來都有人喺聖誕節「其實自己一個更開心」，今季轉戰澳職嘅日本中場本田圭佑平安夜就扮吓聖誕老人，喺墨爾本街頭同班小朋友踢吓波簽吓名咁，同其他人分享快樂都幾有意義吖。本田cosplay聖誕老人喺夏天嘅墨爾本走嚟走去，真係見到都熱呀！