支持台獨嘅樂團閃靈因為不獲入境處批出工作簽證而未能來港演出，網媒「香港01」早前就訪問咗閃靈主音林昶佐，不過就惹起風波。
指記協懶理「反中」報道
事關「香港01」喺文末特別戴頭盔加咗句「編者按：香港01一貫立場是反對台獨」，引來香港記者協會質疑係畫蛇添足，不過黨媒《環球時報》噚日就發文力撐「香港01」，反而鬧記協唔指正「反中」報道，其實係「暗中助獨」。
《環時》噚日發表〈“反中”報道不管，香港記協卻對港媒“反台獨”立場零容忍〉嘅網上報道，引述網民對於「01」編者按嘅睇法，指記協對其他「反中」報道從未指正，對該媒體（「香港01」）嘅指摘先至係「畫蛇添足」喎！
《環時》又引述另一網民，質疑記協冇表明反對台獨立場，就係「不反對台獨及港獨」，批評係「實際就是暗中助獨」喎。
今次連《環時》都要出手相助，睇嚟「香港01」做法雖然冇乜香港人認同，但就盡得黨媒讚好，俾人鬧都抵喇。