以芝士奶蓋茶聞名嘅內地品牌「喜茶HEYTEA」喺沙田新城市廣場開設香港首間分店，好多後生仔未開門就排晒隊「朝聖」，有人仲喺開舖前一個鐘已經去排隊，仲要等成兩、三個鐘先買到，不過八方估唔到飲杯「喜茶」都會引起網民大戰，仲要扯到本土同抗共有關。
其實包括連登在內一班登仔在內嘅網民，已經成日話大陸文化入侵香港，明知大陸食物安全有問題，仲要有班人成日吹奏返大陸食嘢好抵，一面叫人反赤化反水貨客，轉頭就返大陸食元素周期表，所以喜茶噚日開分店，有連登仔見大批後生仔排隊，已經出po話明白點解香港抗爭咁廢，仲話呢班人見有買一送一呢啲小恩小惠就搶住去，冇啲骨氣，仲話「你望吓人哋法國黃背心革命，再望吓排喜茶嗰班人，你就知對抗中共呢條路真係好難行」。
不過亦有人指唔使上綱上線，樣樣拉到去抗唔抗共！飲杯喜茶都可引來網民大戰，其實可以睇到仲有好多年輕一代對大陸真係冇好感。