今日係聖誕假期，如果冇外遊又想睇風景，大棠一向係唔少香港人郊遊好地方，不過有市民覺得，可能受之前超級颱風山竹影響，今年紅葉較往年稀疏，再加埋呢兩日落雨吹走唔少紅葉，今年大棠風景較往年遜色。
其實上周五漁護署已經更新大欖郊野公園楓香林紅葉情報，「紅葉指數」達B至C級，即係「開始紅」同部份仍屬「黃」。八方遇到元朗居民黃先生，佢不時會去大棠山道散步，覺得今年紅葉未及往年鮮艷，佢話可能同之前山竹襲港吹走唔少紅葉有關。另一位第一次到大棠觀賞紅葉嘅馮同學話，自己出發前有參考紅葉指數，但或因天雨關係，紅葉唔係好夠紅同有啲疏落。
由於假期會多人去睇紅葉，漁護署建議盡量使用公共交通工具，而12月25及26日仲有特別交通安排，巴士路線68R來往元朗形點交通交匯處到大棠山道，服務時間為上午8時半（元朗開出）至下午6時半（大棠開出）。