爆相爆片：
女店員捉賊　硬食兜肚飛腳

「捉佢捉佢，報警！」將軍澳翠林商場一間便利店嘅女職員一路追一路嗌，讀者陳先生走上去了解同拍片。原來上周四下晝3點左右，一個女人喺便利店懷疑偷嘢，被女職員喝住，佢向女職員掟嘢仲伸咗對方個肚一腳，女職員追出，一個男途人幫手將佢女賊制服。

女賊被制服後一直瞓地下，男途人鬧佢：「你唔好扮儍呀！啲街坊俾你恰嘅咩？人哋喺度打工咋嘛，你打人做乜！」個女賊就話：「對唔住，我講sorry！」保安員都有埋去了解，在場人士報警。

警方表示，嗰個37歲姓廖嘅女人喺便利店偷咗一樽價值10蚊嘅鮮奶，同埋一本200蚊嘅雜誌之後走咗去，便利店54歲姓羅女職員追截，俾對方踢咗一腳，最後由途人制服賊人。廖女涉嫌盜竊同普通襲擊被捕。之後疑犯同女職員分別送院治理。