現年37歲的莊端兒兩年前跟張致恆甩拖後，一直單身，近日她在杜汶澤網台節目倒瀉35E奶，被封「Double May」，藉此她更接下賀歲片《如珠如寶》演出波波姐。莊端兒珍惜機會，事業為重，暫時未有意思拍拖，並大爆媽咪還介紹男仔給她，對方條件雖好，無心戀事的她，一律請這班裙下之臣食檸檬。
採訪：嵐山
攝影：林德雄
擁有35E咪咪的張致恆舊愛莊端兒自從加入杜汶澤自家網台，用「事業心」報道一周大事，令她人氣急升，成為網絡紅人。莊端兒這位「Double May」，想不到今日聖誕節要孤獨度過，她日前接受《蘋果》專訪，自爆聖誕節沒約人，所以好平安：「分手兩年幾都冇拍拖，雖然一直有人追，但難得多咗人認識，唔想嘥時間喺拍拖上，因為知道自己一拍拖就會好投入。」
媽咪做媒
莊端兒透露媽咪有介紹男友給她，而且對方的條件不俗，家境很好，偏偏神女無心，她說：「唔算帥，但環境唔錯囉，覺得好老土，好似相睇咁。」問到她的擇偶條件？莊端兒續說：「最緊要唔好食煙，我有嚴重氣管敏感，一咳就咳到甩肺，孝順、專一呢啲基本嘢，最好有經濟能力，起碼負擔到自己，咁先可以照顧到人。」對方可要接受莊端兒會性感演出？她說：「真係唔係個個男朋友都接受到，有時有啲性感，又有好多宅男鍾意你，但如果有追求者，現階段我都ban埋。」雖沒對象，但會考慮雪卵待日後生B？莊端兒說：「身邊好多朋友都有做，但聽講幾痛，又會肥，我𠵱家身體機能都幾好，所以唔使雪住。」
減肥拍戲
知名度大升，莊端兒獲邀演出賀歲片《如珠如寶》，還第一次做「女主角」波波姐，她興奮說：「係戲中戲嘅女主角，講我係性感女神，驄哥（林敏驄）買咗件加細碼泳衣畀我，有場戲要不停跳跳跳，但點跳都整唔甩，因為真係好緊。」莊端兒更為了以最佳狀態演出而積極減肥，由最高峯的體重132磅減到現在118磅，莊端兒分享當中秘訣：「真係地獄式，用咗兩個幾月時間，食少好多嘢。因為我之前割咗個膽，本來已經食得好清，油炸嘢唔食，飲多好多水，原來水好重要，越飲得水少越容易水腫，仲有焗身、跑步同游水。」那她可是對票房有信心？莊端兒即說：「有呀！我哋賣搞笑之餘，仲賣親情，家有一老如有一寶，可以一家大細一齊睇。」
化妝、髮型：faye's makeover
