楊立門明年1月在香港大會堂有兩場演唱會，演唱會名字是《好歌萬年青》。這是他加入唱片公司環星娛樂後，首個個人演唱會。楊立門的背景和一般歌手不同，他是政務官出身，仕途順利，官至最高首長級D8級，曾任發展局及民政事務局常任秘書長，三年前提早退休，去年加入中華廠商聯合會當行政總裁。他還在雜誌寫專欄，小說也寫過兩本。年過半百，他喜愛的人生，好像才真正開始。
訪問在蘋果日報大樓的影樓進行，公關一早通知，訪問時間約一個小時，楊立門準時到達，紅色T恤加黑色外套，再配一條暗紅色洗水爛牛仔褲，手腕戴一隻Panerai手錶，形象和我想像中的政府高官或行政總裁有很大分別。
楊立門還在政府任職的時候，就有「AO歌王」這個外號，他喜歡唱歌，在政府內外都出了名。離開政府後，他常常在不同的慈善演唱會上獻唱，今年記者協會的周年晚宴，他也應邀上台大展歌喉。
「做慈善show，和不同的慈善團體合作，我分文不收，有主辦單位負責搞，但如果做商業性質的演唱會，對一個從來無從事專業歌唱嘅人嚟講，加入一間唱片公司會好有幫助。始終一個人好難單打獨鬥，樂師伴奏、舞台燈光、推廣票務，我樣樣都唔識，要搵專業唱片公司幫我先可以成事。」
兩年前他加入環星娛樂，正式展開專業歌手生涯。環星娛樂主打懷舊金曲，旗下的歌手藝人有尹光、呂珊、薛家燕等，今次是他首個個人演唱會，亦以金曲為主。
「咁我都唔係後生，當然唱呢啲，但我亦都鍾意唱，對象會係一班喜愛聽舊歌嘅聽眾，演唱會會唱歐西流行歌、民歌、日文歌，仲有武俠劇主題曲。」
撰文：李偉圖
攝影：許頌明
錯過的歌手夢
楊立門今年58歲，四年前選擇提早退休，早點離開政府。
「其實我身邊好多人，走到某個歲數，事業上有啲成就，仔大女大，就會思考人生下半場應該點樣，好多都會去做一啲完全無關嘅，有人開社企；有人去旅遊寫blog；有人做生意；有人做義工。
「我覺得自己係屬於創作嘅人，想寫書想唱歌，但你一定要拋個身出嚟，離開舒適地帶，先知道有乜機會喺你面前。
「所以我唔覺得自己係退休，只係要離開政府，先可以開始第二頁。」
楊立門有三個姐姐，年紀和他相差一大截。他自小喜歡唱歌，姐姐們在家聽歐西流行曲，聽Beatles，他在家也跟着唱，後來國語時代曲興起，他就聽青山、姚蘇蓉。
「中學開始參加好多歌唱比賽，好多都攞獎，開始覺得自己應該識唱歌。」中四那年，他和朋友一起參加商台的全港歌唱比賽，他做主音朋友彈結他，自選歌曲Streets of London，結果勇奪季軍。
「好記得第一次攞獎，獎品係六百蚊歐化傢俬禮券，好開心。」
後來他入讀港大文學院，主修比較文學，1982年畢業，同年參加無綫主辦的第一屆新秀歌唱大賽，由初賽、準決賽，一直殺入決賽。
「準決賽喺利舞台，三十幾人揀十五個入決賽，其中一個就係梅艷芳。」決賽前夕，他收到政府通知，將會聘請他做政務官，他思前想後，最後決定退出新秀比賽。
「音樂總監黎小田打電話畀我，問點解退出呢，話我好有機會，十五個參賽者之中，得我一個男仔係唱廣東歌。
「但那個年代，你係港大畢業生，AO係好難考到，一份政府最top嘅工offer畀你，（但）入娛樂圈要講際遇，亦唔知會唔會紅，其實唔會考慮得太多，亦都唔係咁難抉擇。」
他於是放棄了歌唱夢，從此在政府一做就三十多年。世事兜兜轉轉，上年他在社交場合巧遇黎小田，談起那年往事，黎小田竟還記得，還邀請他到無綫的音樂節目《流行經典50年》獻唱。
最愛推理小說
除了唱歌，離開政府的這幾年間，楊立門還寫了兩本書，一本是短篇小說集《去．留》，另一本是長篇小說《獨舞黃昏》。他平日最愛讀推理懸疑小說，最喜歡的作家是英國的Agatha Christie，還有日本的松本清張、東野圭吾，順理成章，他的第一本長篇小說也是推理小說。
「香港好難靠全職寫作維持收入，寫小說更加係，有幾多人睇小說？好多人話好鍾意睇書，其實係鍾意睇比較工具性嘅書，講財經金融、名人傳記、去旅行呀、煮餸呀，但我呢類比較文學性嘅小說，唔會有咁多讀者花時間睇。
「雖然小說唔會好暢銷，但有人睇完覺得幾好，我已經好開心，冇諗過自己可以寫到一本長篇小說，好有滿足感。」
每個作家都有自己獨有的寫作節奏和習慣，日本作家村上春樹，是在看棒球賽的時候，突然有靈感，覺得自己可以寫一本小說，於是第一部作品就是在自己的酒吧打烊後，每晚在廚房的桌上寫成的。他寫小說的創作過程是怎樣？
「沒有甚麼可以分享，寫作其實係好孤獨嘅工作，我主要寫嘅時候喺張床上面，有時喺圖書館寫，有時去舊山頂道會所嘅圖書館，有時去港大圖書館。」
初次執筆，有甚麼困難嗎？有沒有例子或心得？
父親的四字車牌
「寫書嘅難度，當然要有深厚嘅文字功力，而文字功力係要長時期積累同埋自己去磨練培養，要睇好多不同種類名家作品，自己要不斷寫作，先可以寫出有水準嘅文字，當然仲有靈感同其他因素影響。」
做人物專訪，最怕受訪者沒有甚麼可以分享，又或者講完好像沒有講。翻查過往報道，他深愛寫作，源於他的父親。關於父親的故事，訪問中他倒是講了很多。
「我同爸爸關係比較親密，父親做編劇，由朝到黑都喺屋企寫稿，嗰時冇Fax機都冇電腦，交稿嘅時候，就揸車出去廣播道親自交稿，我自細喺呢種環境氛圍下長大，好嚮往呢種生活，做作家亦係我嘅夢想。」
他的父親楊普禧，是上世紀60年代著名編劇，作品有《大丈夫日記》、《十八樓C座》等等，楊家一家六口，就靠父親手中一支筆養大。楊立門的名字，取自成語「程門立雪」，出自《宋史．楊時傳》，父親自小就要兒子背誦唐詩宋詞四書五經，薰陶他對文學的喜愛。
「會考有一科叫中國文學科，當年學校冇呢科，爸爸就提議我自修報考，佢會負責教我。」楊爸爸做足工夫，研究課程大綱，將大綱內的文章全部看了，再替兒子補習。「結果會考成績，中國文學科我攞A，好多謝爸爸。」
父親2003年逝世，幾年後楊立門無意發現父親生前的四個數字車牌在政府拍賣，於是投得車牌，掛在自己的車上。「我自細坐呢架車長大，對呢個車牌有好深厚感情，後來爸爸冇揸車一段時間，車牌就畀番政府，剛好政府拎呢個牌出嚟拍賣，通常政府拍賣車牌，收入都會作慈善用途，咁當做吓善事，亦係一個對父親嘅紀念。」
不想和時代脫節
難得重拾自己喜愛的唱歌和寫作，我有一個疑問，既然已離開政府，財政狀況又應該暫時不愁，為甚麼不全心全意唱歌寫書，轉眼就有份全職工作，去年開始在中華廠商聯合會做行政總裁？
「其實從政府退休後，我冇諗過唔做番嘢，除非我其他方面發展好好，先會考慮唔做全職工作，反而𠵱家呢份工，可以畀我同社會保持一個聯絡，唔會同個時代或者社會脫節。
「呢兩年好多公司搵過我，職位幾高層，薪金亦唔錯，地位都好好，但份工都唔適宜我出嚟唱歌或者寫嘢。直至廠商會會長搵我，呢份工又有好大自由度，就一拍即合。」
他大半生在政府工作，人面很廣，第一本短篇小說，是林煥光為他寫序。他會否擔心，買書的或來看演唱會的，可能很多都是畀面，真心欣賞的知音人，其實不多？
「當然我唔排除有人真係識我，所以唔好意思唔捧場，咁我希望呃佢一次，佢聽完，知道我真係識唱歌，唔係玩玩吓，第二次會真心嚟捧場。咁當然我好多朋友都有同我講，原來我唱歌咁好，或者覺得本書好睇。」
書已經寫了兩本，嚟緊也有個人演唱會，那麼下一個目標是？
「希望唱多啲歌畀人聽，因為香港其實好多人鍾意聽舊歌，但其實冇乜人識得我，希望多啲人認識我，寫書方面，亦都希望可以多啲時間寫多本小說。」
訪問結束，他嚷着說要趕回公司，首先要換回西裝，晚上還要應酬，過幾天待樂隊將演唱會的樂曲編好，就要再夾多一次……
楊立門的第二人生，多姿多采。
