隔牆有耳：
遇到命中閔大人　
白鴿黨大長今封盤 - 李八方

即將告別2018年，政界有喜事傳出，2015年首度參加沙田區議會選舉就喺馬鞍山富龍一擊即中，打敗建制地頭蟲當選嘅民主黨「大長今」曾素麗（Yen），日前接受咗中大講師男友袁效賢（Raymond）求婚，30歲嘅佢，正式封盤嘞！

欣賞男方善良孝順

八方噚日打去恭喜阿Yen，未待八方開口，佢已經笑唔停口，話估到八方想問乜嘞，透露同男友係喺一個婚禮相識，當時男方打開話題嘅方法，八方都估到，就係話自己係曾素麗議員粉絲囉！據知Raymond亦好有心思，上周四趁兩人拍拖一周年之時，準備咗99支玫瑰向阿Yen求婚，最終成功奪得美人歸。

講到呢個「封盤人」優點，阿Yen話最欣賞對方善良同孝順，同埋覺得雙方好夾。雖然阿Yen好快就正式結婚拉埋天窗，但各位男粉絲唔使擔心阿Yen從此退穩，因為阿Yen據知仲積極考慮緊競逐連任，當選後亦一直積極地區工作，各位粉絲日後可以喺馬鞍山，繼續見到呢位靚女區議員。