今年聖誕最開心嘅球迷，除咗要數到英超榜首嘅利迷外，前英超名牌球會列斯聯嘅忠實粉絲，相信亦可會過一個快樂聖誕；事關禮拜日列斯聯落後兩球都冇放棄，下半場連入三粒，喺補時五分鐘絕地反勝阿士東維拉3:2，登上榜首成為英冠聖誕冠軍，球迷來季有望喺15年後，再見「白玫瑰」征戰英超！
列斯聯喺90年代嘅英國球壇都風光過，佢哋先喺91/92球季，有名將簡東拿、麥亞里士打同史必壓陣下，贏咗最後一屆以英甲名命嘅頂級聯賽冠軍；到千禧年列斯聯仲颳起青春風暴，阿倫史密夫、基維爾同活基治上位，先幫白玫瑰拎到英超史上最叻嘅季軍，仲曾經喺歐聯殺入四強。
歐聯四強淪落英甲
呢個時候，列斯聯嘅董事局同領隊奧拉利決定大灑金錢玩鋪大，先後買咗維度卡、達葛治、里奧費迪南同羅比堅尼等戰將，點知喺00/01球季嘅歐聯四強，遇上當時有艾耶拉、柏歷堅奴同艾馬壓陣嘅華倫西亞，最終兩回合輸0:3出局，距離成為歐洲王者只差幾步。
不過花無百日紅，因大事收購搞到成身街數嘅列斯聯開始「賣星」，雲拿保斯接替奧拉利後戰績更加冇眼睇，最終喺03/04球季降落英冠，三季後仲因財政問題被扣10分再降埋落英甲。直至10/11球季先升返上英冠，但就連續7季不入前6無緣英超。
不過白玫瑰球迷終於見到曙光喇！事關今季以破球會最高薪紀錄、請咗阿根廷名帥比爾沙（小圖），呢位被哥迪奧拿稱讚係世界最佳嘅領隊果然有料，禮拜日聯賽半場輸緊兩粒，相信班球員喺更衣室一定俾比爾沙鬧爆。下半場比帥就大膽換入18歲小將積克奇勒，連同守將邦圖斯贊臣建功，再憑射手基馬胡菲補時貢獻絕殺球，好戲劇性咁3:2反勝維拉升上榜首。賽後，英文唔叻嘅比爾沙透過繙譯向傳媒大讚球員，對於過去10年聖誕冠軍都升到班，比爾沙就話希望佢哋唔會例外啦！即管睇吓下季英超，會唔會睇到比爾沙招牌式大媽上身，踎喺場邊督師啦！
米拿念舊出po撐
至於列斯聯嘅青訓產品，目前效力利物浦嘅占士米拿，周日賽後都喺ig出張有晒英超同英冠前列形勢嘅圖，賀自己兩隊波都坐榜首，都算念舊。