朱薰與老公譚健榮結婚8年，育有5歲半囝囝譚永之（Liam）及兩歲半囡囡譚在之（Liv），日前一家四口去了馬灣感受聖誕氣氛，齊玩電動鹿車、整熊仔與夾糖果，Liam要求與爸爸「賽鹿」，而慢熱的小公主Liv就怕醜纏着媽咪唱聖誕歌。
自行解決問題
明天聖誕節，Liam興奮地表示有聖誕老人送禮物：「我喺屋企明明見到聖誕樹下面冇禮物，擰轉面再望就有喇，聖誕老人喺煙囱掟啲禮物入嚟。」阿榮就問囝囝屋企煙囱在哪，Liam想了一想後說：「屋企冇煙囱，佢喺冷氣機度走出嚟。」而Liv就坐在鹿車溫柔地表演唱歌，而Liam突然開着鹿車整蠱她們，嚇到妹妹哭了起來，朱薰立即安慰Liv，同時亦教訓Liam：「哥哥頭先係咪做咗啲曳嘢？你唔好玩住，同妹妹道歉先。」朱薰解釋平時妹妹蝦哥哥多，而Liam就會讓妹妹，她會讓兩兄妹自行解決問題。
抵抗名校洪流
朱薰自言湊小朋友似電影《西遊記》內羅家英飾演的唐僧：「煩！煩到佢哋唔想再做啲曳嘢，不停煩，不過呢個過程好漫長，可能要三、四年先見到效果。」仍然處於新手父母，她笑言邊教邊學：「以為自己用啱方法嗰陣，佢哋又大個咗，所以我都係不停迷惘、不停學習。好多朋友都問我做乜唔去玩，其實我除咗工作，就畀晒啲時間佢哋，投資呢十年，希望打好個底。十幾歲佢都有自己朋友同生活，𠵱家希望佢哋二十幾歲嗰陣，有乜事都會返嚟搵我、有心事同我傾就已經好好。個個衝去考名校，如果我諗住讀普通學校、開開心心，就好似小眾、好怪咁，所有都要自己去抵抗呢個洪流。」
採訪：盧妹
攝影：沈健程
場地提供：香港挪亞方舟
