平安夜，感覺平安嗎？有平安感的，一定要點名潘鄭那個僭建地牢。一路向下，僭出N坪，神不知鬼不覺，獨享空間。在畸形納米樓叫價近千萬的今時今日，地牢僭出來的面積，超渴市，所謂不犯法卻是市民無法共享。這個地牢，是一人的天堂，是車位當床位的香港人的地獄。地牢唔會塌，法治，就冇咁樂觀。
別墅地庫幾時塌，風水佬會知。地鐵月台唔同，如果與四線列車一齊仆，邊個問責？MeNo？抽驗鋼筋，隨機五條，五條都肥佬，咁都唔代表乜嘢？係嘅，港鐵高層識條鐵，月台安全，條紅線任佢劃，提告喔？睇唔到有利益衝突喎，司長與特首，百分百唔會去紅磡月台搭車，唔識轉線去土瓜灣。這兩個屬於九西的選區，既然是建制操盤一票都不會輸的紅區，唔信鏡，都信殯儀館對面掛出的大頭宣傳照，健康地諗，馬頭圍塌樓慘劇永遠唔會在紅磡重演。投建制票的居民，今晚攬實蛇齋餅粽墊底的平安符，向習帝唱頌：平安夜，萬暗中，光華射……市民唔介意幫華為射射！耶誕應景派華為，屈大媽上身的建制粉，搶！華為從天而降，夠神吧，舟舟公主，搶手過幣少。