呢邊廂基斯坦奴朗拿度（C朗）嘅前東家皇馬贏世冠盃，另一邊廂，佢嘅新球會祖雲達斯上周六就喺意甲主場以1:0小勝羅馬，繼續排榜首。不過今場冇波入嘅C朗，今年暫時入咗46球，如果佢之後兩場意甲都唔會上陣嘅話，咁今年將會係佢自2010年之後，首次一年內入少過50球。
主隊今場喺上半場錯失浪接浪嘅機會，踢到35分鐘，迪施基利奧喺右路大腳傳中，克羅地亞前鋒文迪蘇傑喺小禁區左輔位置力壓羅馬後衞頂入，祖雲達斯半場領先一球。換邊後，祖記繼續主導比賽，但就唔能夠再入多球，C朗先後兩次頭槌攻門都失諸交臂，一球就越楣而去，另一次就俾羅馬門將羅賓奧臣撲走。C朗去到補時階段仲曾經助攻畀杜格拉斯哥斯達射入，但球證指祖雲達斯喺組織入球嘅過程中有球員犯規，入球被判無效。不過祖雲達斯最終都有驚無險全取三分，贏波後以17戰得49分續排榜首，領先次席嘅拿玻里八分。
賽前就有指C朗踢完今場之後，獲准提早放聖誕假，換言之即係佢好可能會缺席祖記26號對阿特蘭大，同埋29號對森多利亞嘅比賽。如果係咁，今場食白果嘅C朗就會以46球結束18年，將會係近8年嚟首次入唔夠50球。