華為太子女孟晚舟近期成為國際知名人物，就連美國法律系學生都好關心事態發展，早前應邀到美國訪問嘅公民黨法律界立法會議員、大律師郭榮鏗（Dennis）向八方透露，佢喺出席美國亞利桑那州立大學嘅Sandra Day O'Connor College of Law畢業禮時，唔少學生都問及孟晚舟事件，孟有香港特區護照、涉事公司又喺香港，所以佢哋都特別關注香港喺事件中嘅角色，當然中美關係亦係呢班法律界新丁關注焦點，反之前局長何志平嘅賄賂罪成案就冇人提及。
明明此行係訪問美國政商界，何解會到訪咗大學畢業禮？Dennis自己解謎，話年初陪前政務司司長陳方安生訪美時識咗上述法律學院院長，對方知道佢訪美後邀請順道出席畢業禮，Dennis引述院長話畢業禮過往好少請嘉賓演講，唔知佢係咪第一個？Dennis席間就同學生講，民主自由同法治真係好重要，雖然佢哋嘅國家出現咗好多問題（冇理由唔關總統特朗普事啩……），但都希望繼續珍惜民主自由同法治，因為相對唔少公民仍然要為民主自由而戰嘅國家而言，美國嘅基礎仲係好穩健。