油尖旺大南區原區議員、經民聯莊永燦上月中因肝癌離世，政府早前刊憲宣佈為大南選區安排補選，補選料於明年3或4月進行，經民聯敲定於莊永燦議辦任義工多年嘅李思敏出選，有地區人士向八方報料，話佔接棒優勢嘅李思敏本月開始宣傳攻勢，有商店貼出其宣傳單張，更掛出多幅「單頭」宣傳橫額，但就懷疑違規，因為一般而言，地區人士要同立法會議員或區議員「孖頭」出橫額，而李不但單頭宣傳，橫額仲冇展示核准編號。八方搵過李思敏，佢話對違規況唔清楚，亦冇收過投訴，透露橫額位係經民聯議員借出，由義工幫手掛上，強調「如果有掛錯，我馬上去了解」。
據知民主派會由喺該區工作年多嘅社區前進李國權勢必出戰搶位，而原本一度有意參戰嘅「九龍角落」則喺民主動力協調後退出戰團，九龍角落主席李軒朗回覆《蘋果》證實，李國章已退出九龍角落，唔會參選，九龍角落亦冇打算派人補上，但組織其餘地區工作者會繼續工作。民主動力召集人趙家賢就話呢區協調進度正面，只餘技術細節要處理，感謝雙方參與。