台獨重金屬樂團「閃靈」未獲入境處批出工作簽證，冇得參加「我們正在音樂節」演出，「香港01」事前赴台訪問咗主角、閃靈主唱林昶佐，呢位代表台獨政黨「時代力量」勝出立委選舉嘅歌手喺訪問中親述同香港嘅一段緣，但唔少人睇晒全文先發現「亮點」係文末嘅「編者按：香港01一貫立場是反對台獨」，惹嚟網民熱議點解又要威又要戴頭盔？
林︰本粉專也編者按
傳媒人潘小濤喺facebook發文指，「報道新聞竟然要宣布傳媒機構立場？世所罕見，惡例一開，根本不可能報新聞！報台灣大選，申明反台獨；報美國新聞，申明反美……。瘋狂的香港政治正確新聞機構！」曾任記者、現於中大新聞與傳播學院任講師嘅譚蕙芸，喺fb轉貼「香港01」相關文章，反問：「點解報新聞要聲明自己政治立場？」
浸大傳理學院新聞系前助理教授杜耀明形容「01」咁做係「除褲放屁，認真多餘」，話係前所未見，指此舉令人覺得新聞同言論自由要符合國家所定嘅條件，「唔符合新聞自由嗰個要求」。
「01」執行總編輯戚本業回覆時強調只係一貫立場表達，重申公司容許記者自由選取訪問對象，希望外界包括評論員留意傳媒現有嘅報道空間。
香港記者協會都發聲明，話「01」咁加注立場做法不尋常，形容係畫蛇添足，令人擔心傳媒對敏感議題有所畏懼。
當事人林昶佐亦喺fb轉載「01」嘅專訪，除咗留言「香港是香港人的，大家一起加油！」等，亦特別提到專訪內文嘅「編者按」好「很神奇」，繼而幽默一番：「本粉專也編者按好了：本粉絲專頁一貫立場是支持台獨」。
李八方