去得海洋公園當然預咗睇唔同動物，欣賞佢哋唔同嘅姿態，讀者Mimi上星期五（21日）去海洋公園玩嘅時候，就發現海洋劇場外同場加映一幕有趣嘅畫面。當日下晝1點半左右，Mimi行過海洋劇場外時，見到有三個女人似乎玩得太攰，除埋鞋並排瞓喺長凳上，其中兩個大媽咁款，另一個着短袖衫牛仔褲後生女。
平時見到有人隨處瞓覺一定好礙眼，但咁啱牆身畫滿水底世界嘅圖畫，又海豚又海馬又鯨魚，就咁睇仲以為三個人喺度潛緊水，又似海洋中嘅睡公主，畫面相當趣致諧和。
Mimi話三個女人似乎瞓得好好，對外邊經過嘅人無反應。不過，Mimi都覺得長凳係畀遊客坐底休息嘅地方，雖然佢哋無發出鼻鼾聲，但係點都有少少「唔係幾好睇，搞到其他人想坐都冇位坐」。