上周六喺阿聯酋上演嘅世界冠軍球會盃決賽，皇家馬德里有金球獎得主莫迪歷先開紀錄下，最終以4:1大破艾阿恩，成就完美一年。銀河艦隊除咗連續三年稱霸之外，亦破紀錄第四次捧走冠軍，成功超越死敵巴塞隆拿。
皇馬四強靠加里夫巴利大演帽子戲法，淘汰鹿島鹿角入決賽，今場面對以互射12碼淘汰河床入決賽、有半個主場之利嘅艾阿恩，開波只係14分鐘就已經靠今年威到盡嘅克羅地亞中場莫迪歷喺禁區外射彈地波得手，亦成為近4年第3位金球獎得主可以喺同年世冠盃決賽入波。
拉莫斯第25場決賽入波
易邊之後，皇馬自家青訓馬高斯洛蘭迪把握對方角球解圍唔遠，以一腳窩利勁射拉開比數。戰至79分鐘，隊長沙治奧拉莫斯接應角球頂入，帶領皇馬遙遙領先到三球。呢位隊長計埋今場嘅話，職業生涯已經出戰過25場決賽，當中有19次都成功捧盃而回，勝出率高達76%，認真犀利。
雖然艾阿恩喺尾段有日本外援鹽谷司頭槌破蛋，但完場前有拿達耶希亞出腳攔截雲尼斯奧斯祖利亞嘅傳波時撞入自己龍門，結果令皇馬以4:1大勝，連續三年奪冠之餘，更超越巴塞成為唯一一支四次稱霸世冠盃嘅球隊。
巴利做神射手攞埋最佳
經歷季初嘅動盪，主帥盧比迪古被炒由蘇拿利走馬上任後，銀河艦隊似乎已經逐步重上正軌。雖然賽後仍然有球迷舉晒橫額，多謝已經轉投祖雲達斯嘅星級前鋒基斯坦奴朗拿度（C朗），仲話佢嘅地位無可取替，不過陣中嘅加里夫巴利喺今屆賽事都大踢爭氣波，呢位備受傳媒同球迷批評嘅威爾斯翼鋒，除咗以三個入波同河床前鋒山度士波里一齊成為神射手外，亦被賽會選為賽事嘅最佳球員，相信係對佢好大嘅鼓勵。教練蘇拿利喺捧盃之後表示感謝將皇馬帶上頂𥧌嘅前教練施丹︰「感謝施丹令球隊有機會再出戰世冠盃，佢嘅成就係難以超越。」
至於同日嘅季軍戰，南美冠軍河床靠下半場連入三球，以4:0大勝亞洲冠軍鹿島鹿角，獲得季軍。