四十四年前之荃灣，紗廠、布廠、製衣廠滿佈，紡織係一個好大行業，粵語片陳寶珠之工廠妹形象，深入民間，多少今天富翁富豪，皆自荃灣出身，左丁山當年年少無知，以為做銀行高級過在染布廠返工，回想起來，笨之又笨。
當年之工廠，今日面目全非，左丁山工作過一個月嘅中國染廠，已變成「愉景新城」，南海紗廠變成為住宅大樓，只有南豐紗廠留存至今。南豐集團早已轉型成為地產發展商，擁資產千億，好多人以為南豐集團一定會將荃灣舊廠址拆卸重建為住宅大廈，賺番百幾億元嘅，點知唔係，集團決定將南豐紗廠四、五、六廠保育起來，改裝成為文化傳承藝術館，叫做「六廠紡織文化藝術館」，放棄過百億利潤唔要，反之投資七億裝修，保留原有面貌，改成藝術館，一定係做蝕本生意啦，以後營運越做越蝕，當係地產商津貼文化發展，市民唔去欣賞享受就係自己蝕本，去參觀過就會向南豐集團董事會講幾句多謝。
負責向傳媒講解六廠紡織文化藝術館（Centre for Heritage, Arts & Textile, CHAT）嘅係南豐發展資產管理部總監劉子敏，以及南豐發展設計部助理總經理盧智恒（中文大學崇基學院2000年建築系），劉子敏話呢個保育計劃叫做The Mills，2014年開始活化保育工程，在2018年12月6日正式開幕，佢負責為呢間「非牟利」藝術中心搵租客，但不以高租金為目標，租金低於市價，特別支持本地商戶，以年輕人為目標（希望多啲年輕人識吓荃灣紡織歷史）。盧智恒話染廠之特點係空間好深，樓底夠高，日光難以射全層，自此在四廠六廠加設天窗，五廠加設玻璃幕牆，引入日光，六廠中庭可以舉行時裝表演，天台加固後做花園，成為公共空間，又為咗方便人流步行，加設行人天橋，將四、五、六廠打通，喺一啲有文物價值嘅地方，設影相「打卡位」，平時舉辦文化研究，例如今個冬季就有藝術展：「鏡頭下的紗廠」及研討會：「紡織傳承：現在與未來」，適宜一家大小前往參觀，對中小學生嚟講，CHAT就係活生生一課通識教育，其實中小學應該組團前往。香港有不少人講保育，口講無用，南豐以實際行動支持，值得香港市民前往一行，久之，好可能成為北海道小樽一類旅遊點！