【本報訊】每年冬至不少市民均外出買餸做節，九龍城街市昨日處處排長龍，有雞販稱買入多一倍雞隻應市，即使加價一成仍貨如輪轉。有肉販表示，內地非洲豬瘟疫情擴散，冬至生意沒有增長，更遜往年。至於市民普遍出手慷慨，有人預算幾千元買餸，亦未怕豬瘟影響食材安全。
杜琪峯做冬不怕豬瘟
今年冬至適逢周六，不少市民趁放假外出買餸煮團年飯，九龍城街市整個早上人頭湧湧，小販普遍指未有大幅加價，雞販玲姐稱昨日需提早半小時，於清晨6時開檔，她透露昨日入貨多一倍應市，因來貨價貴一成，「自己賣都加番相應價錢，不過啲客最緊要有新鮮雞食」。玲姐指不少市民冬至會買雞拜神，估計生意與往年相若。
不過，海鮮檔販冼小姐指今年冬至臨近聖誕，部份客人外遊，生意較往年減少達一成，即使來貨加價，亦未敢上調售價，但仍大嘆失了預算，「冬至訂多咗貨，家陣失晒預算」。
另外，內地非洲豬瘟疫情來勢洶洶，即使檔外有市民排隊，肉檔小販吳太稱生意仍比往年少約三成，「可能都係驚豬瘟，供應商都唔敢加價，我哋都冇加」。吳太對生意不抱樂觀，「賣得晒啲貨都偷笑，冇話早收啦」。
市民則普遍表示做節不會計較食材價錢，導演杜琪峯昨午偕妻子到九龍城街市買餸，他預料有20人一同做冬，未有特別預算，「百物騰貴，有得買咪買囉」。他又指不怕內地豬瘟，「香港政府畀得人賣都冇事嘅」。市民陸生打算吃火鍋過節，預算幾千元餸菜錢買龍蝦、蟶子、本地牛等。
■記者劉永明、謝頌昕
