「有人話過我逐隻錶咁做冇錢賺㗎，所以當我五年前決定創業時，身邊大部份人都覺得唔可能」──恰恰相反，本地獨立製錶品牌Anpassa創辦人Gary就將不可能變成可能。五年後的今日，他造了超過2,500隻手錶，每一隻都盛載着不同顧客、獨一無二的故事。
記者：黃碧基
曾從事噴畫生意和婚禮攝影師的Gary，曾奪國際婚紗攝影師大獎。當事業略有成果時，卻毅然成為製錶師，「我3、4歲已經開始好鍾意手錶，當時隔籬屋送咗隻錶畀我，我記得係一隻膠錶……」，自此他買過各式各樣的錶。五年前，他發現坊間有很多陀飛輪錶的價錢並不透明，名牌售價過百萬元，本地的也動輒數萬元，於是激發了他拆開太太的一隻勞力士，發現其實結構沒想像中般複雜和困難，就在那一分鐘開始決定造出世上只有一隻、且價錢貼地的陀飛輪錶。
盼為客人留住寶貴回憶
時至今日，他最平賣過幾千元的錶，最貴的錶也賣過百多萬元；最快試過在24小時內完成一隻錶，最耐則長達兩年。他指客戶願意花於等待造錶的時間，不止是單純為了一隻錶，而是內藏故事的心機之作，因為手錶需要以客戶的故事而生產，在溝通、購置物料配件和工藝上均需時。
雖然所造的錶不能夠為顧客回到過去，但他盼望自己能為顧客留住某個寶貴回憶。曾經有一位富商請Gary造錶，該名富商只提出了兩個要求，第一是錶面要有他的名字，第二是錶底要有出廠日期。Gary那時候不明所以，後來得悉該富商得了重病，希望訂製手錶給予他的親人和曾為其效力的老臣子。
另外也有不少大膽的嘗試，「一般龍鳳𠼦都係結婚嘅時候新娘子戴，我就諗下有乜辦法可以變為男女都一齊戴呢」，於是以999足金造出龍鳳𠼦錶，令一對新人婚後可將足金配件拆下換成皮帶，將親人的祝福帶在身邊。
不過，在Gary身上最真切的故事，是他在兒子滿月的時候，用18k金造了一隻有兒子樣子的馬騮手錶，「錶盤上有佢個名，錶底最重要係有爸爸媽媽送畀佢嘅祝福」，而他為兒子造的錶也不乏膠錶，為的是讓兒子「每一個時段都有一個回憶，將錶留低畀佢將來慢慢去回憶」。
回首創業之初，他只花了15,000元；時至今日，生意穩步增長，現時月收20至30隻定單，每月營業額介乎30萬至80萬元；至於一般手錶利潤率超過一半。他也經歷一段艱苦時間，「超過八個月係一隻手錶都冇賣過，亦冇人去問我哋隻手錶值幾多錢」，幸而在一個展覽上嶄露頭角，第一張定單便超過200隻。
辛苦背後，太太默默支持，他哽咽道，最大壓力是「唔知道你可唔可以賣出一隻錶，或者能夠令到你生活」，但太太在背後不斷鼓勵，「繼續啊！你堅持，只要你做一隻錶，賣出一隻錶，其實你嘅成果已經喺度」，所以今年特別製造了一隻手錶，裏面有太太、兒子和其名字，送給一直支持他的太太。
相機和錶都代表着其工作生涯，他說鐘錶的「滴答」聲，與相機的快門聲相似，有一種很清脆的感覺，讓人在寧靜的環境裏，感受到人生時間和快門是一樣，「只要把握到時間，你嘅人生就過得更精彩」，並以座右銘「我唔怕輸，最怕係成功，因為成功後是失敗嘅開始」，警惕自己在創業路上永不驕傲。