參選港姐被不少人視為釣金龜的捷徑，但05年落選港姐、現年38歲的袁彌明卻打破定律，十年前開始做KOL，靠網上拍片教人扮靚起家，至今已擁有九間專門店，今年2月公司更在創業板掛牌，未夠40歲已成為上市公司CEO。她自言要多謝當日跟無綫的合約糾紛，才有今時今日的自己。
撰文：嵐山
攝影：沈健程
袁彌明日前落舖頭巡視，順道接受本報專訪，她說：「自己生意梗係緊張，有乜做乜，與其等第二日，不如我即刻做咗佢就算。」或許這就是她成功的秘訣，由港姐到KOL，再搖身成為市值近三億港元公司的CEO，只是短短十三年間的事。
05年參選港姐，袁彌明入圍最後五強，可惜名落孫山，選完兩年後就離開無綫，她說﹕「冇後悔，如果唔係發生合約糾紛，其實都唔會有今日嘅我囉，諗番都覺得唔應該同唔尊重自己嘅人一齊合作。不過又咁講，喺TVB我都冇一個穩定收入，叫有一、兩個節目孭喺身，但佢話cut就cut，話雪藏就雪藏，所以跳唔跳出嚟都一樣冇保障。」
客串過戲癮
塞翁失馬，焉知非福。袁彌明連政治都涉足，搞美容生意亦頗成功。她說：「咁你話大生意，大把人生意大過我，人哋幾百間分店都係咁做啦，我就寧願慢慢expand，慢慢經營。」賺錢之餘，她有時亦會不計酬勞幫港台拍劇，早前她與寶珮如、梁雍婷合作拍《火速救兵IV》，劇集將於下月重播一小時足本版，她說：「我係港台之友，因為拍嘅時間唔太多，都係客串過吓戲癮。我都知自己唔係太適合做演員，因為冇乜同理心。劇中我做人媽咪，唔會介意，去到我呢個年紀嘅演員都係做緊人媽咪啦，只係驚同仔女connection嗰part做得唔好。」
堅決不生仔
袁彌明14年與拍拖一年多的前謎網行政總裁林雨陽結婚，不過她堅決不生BB：「唔生仔㗎！都99.999%心意已決，我好需要有自己一個人嘅空間，同埋要寧靜囉。如果有小朋友不停喊、不停叫，我諗我頂唔順。我老公都冇所謂，我反而好鍾意貓貓狗狗，一見到就會走埋去抱，真係偏心。」沒有下一代，她有認真想過身故後遺產的去向，最想做慈善，成立基金，用利息提供獎學金給有需要的人。
場地提供：彌明生活百貨
暗嘲翠翠整容
由出道到從商從政，袁彌明是出名的辣妹，直腸直肚。她曾暗嘲同屆港姐冠軍葉翠翠整容及釣金龜，又試過跟高登仔「開拖」，講明「閒人冇嘢做先會上高登」。
袁彌明說：「I still hold my argument（論據）！仲有一單，話我唔請用緊Yahoo mail同hotmail嘅人做我助手，咁我𠵱家都仲係hold個principle㗎！At least都係用一個有效率嘅mail service啦大佬，即係可能hotmail同Yahoo唔係路嘅，你仲用netvigator mail，咁我真係睇唔起你喎。」
