翻生喇！皇家馬德里周三憑加里夫巴利喺11分鐘內連入三粒，喺世冠盃四強以3:1淘汰鹿島鹿角，打入喺阿聯酋舉行的世冠盃決賽，周六就會同艾阿恩爭冠軍。巴利周三喺44、53同55分鐘極速「戴帽」，幫皇馬領先鹿角3:0，佢仲成為基斯坦奴朗拿度同蘇亞雷斯後，第三個喺世冠盃戴帽嘅球員。鹿角去到78分鐘先由土居聖真破蛋，但就無阻連贏兩屆冠軍嘅皇馬贏3:1出線，「艦隊」已經連續三年殺入世冠盃決賽，算係咁啦。皇馬之前贏過三屆（2014、2016同2017年），周六如果贏埋艾阿恩再捧盃，就會超越都係三屆冠軍嘅宿敵巴塞隆拿（2009、2011同2015年），破紀錄第四次喺世冠盃封王。