曼聯周二怒炒摩連奴，不足24小時已經搵到曾經效力過紅魔長達11年嘅名宿蘇斯克查接手，出任看守領隊到季尾，而且因為球隊周末就要作客卡迪夫城，蘇B亦唔敢怠慢，周三晚已經由挪威搭私人飛機飛抵曼市，進駐摩佬之前住咗成兩年有多嘅羅利酒店，之後周四清晨天未光，已經由司機接載起行去卡靈頓展開首課操練，同班球員見面，但就會等到周五先開記招見傳媒。
教番自己踢過嘅大球會，機會千載難逢，雖然蘇B本身仲教緊挪超球會莫迪，月初先續多三年約，但佢就冇諗咁多，一於返奧脫福救命。英媒就話，曼聯向莫迪借用嘅蘇斯克查費用要成180萬鎊（約1,800萬港元），如果佢真係有幸下季坐正，曼聯就要向莫迪賠償800萬鎊。另外，佢入住嘅羅利酒店，如果揀好似摩佬之前要求嘅豪華河景房，一晚都盛惠600鎊，所以佢家陣教到季尾，相信住宿費都唔平。
另一邊廂，摩佬返到倫敦屋企後，一出門就遇到記者，佢開頭都唔多肯接受記者提問，聲稱對被炒一事不予置評，仲對鏡頭嬉皮笑臉，但之後冇耐就發聲明，話仍然為自己能教呢隊波感到自豪，而且亦向喺曼聯曾經合作過嘅每個人都送上最深敬意，唔知傳同佢反面嘅保羅普巴係唔係其中一個呢？
