熱刺威威！孫興民同迪利阿里周三分別喺上下半場入波，幫作客嘅熱刺喺英聯盃8強以2:0淘汰阿仙奴，不過阿里入波冇耐就俾球迷掟膠水樽中頭獎，好在佢冇受傷，仲寸到向兵迷做出2:0嘅手勢作回應。熱刺今場21分鐘就有孫興民開紀錄，到58分鐘，哈利卡尼入替盧卡斯莫拉，卡尼一分鐘後就交靚助攻，阿里單刀挑射得手，熱刺領先到2:0。之後阿里喺73分鐘準備開界外球嗰時，就俾球迷掟嘅膠水樽搞到中頭獎，冇事嘅阿里梗要攞威，用2:0手勢寸番廠迷。熱刺最後都贏到2:0，自2010年後終於喺阿聯酋球場贏波。不過南韓兵孫興民就決定咗踢亞洲盃，1月兩場英超同英聯盃4強唔使預佢喇。英聯盃抽籤後，熱刺會喺4強鬥同日1:0淘汰般尼茅夫嘅車路士，另一場曼城就爽喇，對英甲嘅伯頓咋。