2015年區議會選舉唔少建制派「雙料議員」墮馬，例如工黨葉榮擊敗民建聯葛珮帆，成為一時佳話，建制派陣地非牢不可破，明年區選又再有人打大佬，挑戰者包括公民黨第二梯隊冼豪輝（Henry），佢向工聯會麥美娟（Alice）挑機，出戰Alice所屬嘅青衣偉盈選區。
八方了解過因乜解究Henry「自尋短見」，佢話自己係偉盈區街坊，而且Alice上屆區會其實係自動當選，唔少街坊不滿冇得揀，所以決定企出嚟博一博。同建制派鬥資源一定冇得比，身為90後嘅Henry惟有靠新鮮感，佢話對家今時今日仲係搞緊量血壓、派嘢，佢就搞搞新意思，每月一次社區共享，成班居民一齊交換圖書、玩具，最重要係提高居民嘅社區參與。
有該區建制派話Henry嘅勤力程度絕對唔可以睇小，但Alice自2004年已經係偉盈區議員，咪以為易打，有工聯會中人就話唔擔心Alice受挑戰，反而有助谷番啲鐵票，提早為Alice 2020年爭連任宣傳。