爆相爆片：強國人為影相　危站凌霄閣平台外圍

李小姐前日晏晝12點幾喺山頂跑步，經過凌霄閣一樓一間漢堡包店嗰陣，隔住玻璃見到戶外平台有3、4個男女企喺欄杆外面嘅平台邊緣戙腳架，估計佢哋係為咗影維港景色。

港人：跌親仲要納稅人畀錢救

李小姐出去平台睇吓，發現嗰幾個男女操普通話，相信係內地嚟嘅自由行遊客。李小姐話其中一個女人用欄河旁邊一條通去緊急出口嘅樓梯扶手借力，爬過圍牆走入平台，非常危險。嗰班人仲鼓勵其他同伴有樣學樣擒出去！而現場唔見有保安員，李小姐話：「你嚟旅遊，如果唔小心跌咗落街，我哋納稅人要畀錢救你！」佢不滿旅客累己累人行為，同時覺得有關景點應該要做好保安措施。山頂纜車公司同記者講，平台唔係畀遊客進入嘅區域，旁邊牆身高達1.59米，估計係有人擅自攀爬上高牆影相，牆身同欄河都有張貼告示提醒遊客請勿攀爬，有關方面日後會增加安全巡邏。