【非常人物】
和細琪一直都是用WhatsApp聯絡的。跟別的受訪者不同，早上9時發出的短訊，會一直「單剔」，直至晚上7時許，甚至凌晨才會得到回覆。但相約訪問的進度並沒因而有所耽誤。「你好，我想和你做個訪問。」「好！」「約在旺角會有點遠嗎？」「可以」……「今個星期四晚上10點？」「OK」。爽朗的回應，在其他受訪者身上少見。
初見面，看不出九十後的細琪和其他女生的分別：五官端好，一把長髮梳得整齊，沒有deep V或露背，亦沒有烈燄紅唇，打扮普通得像任何一個剛下班回家的OL。只是她一說話，聲線有點沙啞，像張栢芝。
大約在三、四年前，細琪入了行，成為夜總會小姐。所謂的夜總會小姐，有人會稱她們為「陪坐」、「陪酒」，行內俗稱「做囡」。「呢份工好正常，就係陪個客飲酒、猜枚、唱歌」。細琪直言入行因為人工高，亦不需「賣身」，「嗰陣返大學搵兼職交學費，上網見到請陪酒，見人工高就做咗。」按細琪說，小姐時薪大約二百元。如勤力接客，月入可高達四萬。
【做 囡】花花世界 純情四眼妹受歡迎
夜總會總給人品流複雜的感覺，裏面是個怎樣的世界？「冇你哋諗得咁黑暗，好多唔同嘅人都會嚟。」年輕男士為主，一班同事下了班來放鬆，甚至警察也有，可不像電視見到的全是中年發福生意人。那麼，有像周星馳電影般，來找「初戀」的客人嗎？「有啊！有客特登嚟搵啲好純情嘅女仔。」原來戴眼鏡的「四眼妹小姐」很受客人歡迎，追求者眾。
被問到最深刻的一位客人，細琪臉上一沉，「有個客人每次到來都說要自殺。」一坐下便向小姐們大吐苦水，然後放聲大唱，唱足一整晚。後來細琪知道原來他在公司不開心，身邊沒其他可傾訴的對象，「咪晚晚落嚟呢度畀錢搵人聽佢講嘢。」一開始，細琪都本着「社工」的心態去聆聽、開解他，最後發現，自己始終只是位小姐，「唔敢做佢生意，好麻煩，成日大吵大鬧，最後公司（夜總會）都唔畀佢入。」
【媽 咪】借醉拐帶 衝出去拳毆鹹濕客
有傷心的客人，也有來尋開心、鹹濕手多多的客人。一說到「鹹濕」二字，細琪不禁拍打了一下大腿，「梗係有啦！」有一次，有位客人想靜靜地帶走一位喝醉了的小姐。入職一年已轉當「媽咪」的細琪在閉路電視看見，便衝了出去捉住那客人。「都知佢想做乜啦！當時我大佢『乜呀！點呀！』，然後一拳打落佢度。」細琪自言無可能會打得過男人，但當下她本能地出盡力打，直至夜總會內其他人趕到。「我係女仔，我都係人，我都有感覺。我（身為媽咪）冇可能會畀呢啲事發生。」
做小姐也有行規。細琪一臉正氣凜然地解釋，現在夜總會不會有「逼良為娼」這回事。接甚麼客，小姐的自主性很高。如小姐不想招呼某一枱客，絕對有權拒絕。細琪甚至將夜總會小姐和現時流行的PTGF（兼職女友）比較，指兩者性質差不多，但夜總會小姐始終有「媽咪」（即細琪）照顧着，可保障她們接觸的都不是立心不良的客人，比較安全。
【真 愛】誠意打動 單身客變現任男友
言談間不難感覺到，細琪非常盡責，時常把小姐們的事扛上身。說是「媽咪」，更是一位大姐姐。「以前跟過啲差嘅媽咪，好客衰客都逼你接。而家做咗媽咪，我一定唔會咁對啲小姐。」記者笑言她是一位正義的「媽咪」，「我真係好正義㗎，我以前想考警察。」升級做「媽咪」，從招呼客人變成照顧囡囡，客人有依依不捨嗎？「其實啲客好花心，呢排可能係咁搵你、話好鍾意你，過一排就會搵第二個。」
對「媽咪」這個崗位，細琪是自豪的。她把這工作形容為「管理階層」，職責是要讓跟隨着她的小姐有好的收入。由「小姐」變「媽咪」，跟外面打工仔升職的原理一樣嗎？「係我男朋友幫我嘅。」細琪和男朋友相識於夜總會，當時她還是小姐。那時的細琪，其實一早看透「愛情」這回事，「細個都會想搵真愛，唔係扮純情，真係想。」可惜，人在歡場，想覓真愛，看似是沒可能的事。「見得太多人（花心者）喇。有啲有老婆仔女嘅都會追你，咁你仲點會信真愛，點會信一生一世呀？」正義的細琪當然不會做第三者，這些追求者一一被她拒絕。正當她心灰意冷時，那位客人出現了。「他每晚都會嚟搵我，好有誠意。後來知佢未結過婚、冇小朋友，咁咪同佢一齊囉，到而家都仲一齊緊。」細琪用自身證明了，歡場，還是有真愛的。
雖說男朋友一早知道她的身世，但真的不介意女朋友拋頭露面嗎？「介意㗎，所以咪幫我轉做媽咪囉。」
【未 來】酒醒之後 「儲錢買樓日日滑浪」
起初細琪做夜總會小姐，沒和家人交代過。當時她只知道家貧，自己要養家、要交學費，顧不了別人的目光。入行後，她很清楚自己和所有人一樣：出賣靈魂換金錢。只是別人返寫字樓工，朝九晚五，她做陪酒，晚九朝五。
回想最低落時，細琪說自己飲酒飲到絕望，「唔通我嘅人生就係咁不停飲？」幸而，她終於遇上了她的男朋友。做了媽咪，不用再飲。酒醒之後，開始想未來：「我想儲夠錢買樓呀，然後日日去滑浪！」
訪問結束，細琪急忙地走到路上截的士，「我啲囡開始係咁搵我喇。」的士停下，匆匆道別之時，細琪嘻嘻哈哈對我說：「記得幫我打格仔呀！一陣畀我未來奶奶見到，實入唔到門呀！」
採訪：Irene方嘉
攝影：譚樂謙