華為在2017年已成為「流動基建設備」之全球最大供應商，市場份額佔28％，力壓瑞典愛立信之27％，憑華為之龐大研發預算（140億美元）及中國之相對廉宜勞工成本，相信愛立信與諾基亞未來幾年會開始墮後食塵！
但華為之大弱點是倚賴外國零部件供應商，尤其是晶片（內地稱芯片）方面，美國更係主要供應商，以高通Qualcomm為主，華為旗下之「美思」研發出「麒麟」晶片，號稱非常先進，不靠外國，究其實，麒麟晶片由美國買入不少授權技術，特朗普一旦發起瘋嚟禁運，麒麟晶片唔知點算。
有專家A指點左丁山：「在人家嘅基礎技術上發展，會快過自己開發基礎技術，然後發展，明唔明？」左丁山話唔明，專家A再講：「嗱！陶傑寫好草稿畀我改，一分鐘就改完，但如果我寫稿畀陶傑改，佢會改到滿江紅，或者由頭寫過，花上一個小時。明白未？」哦，咁就知道啦！美國賣基本技術專利畀華為中興，再在呢啲技術基礎上投放大量財力人力來改良改善，希望青出於藍，梗係容易過自己由頭做起嘅！
專家A話：「咪係囉，華為正在用金錢買時間，每年向高通、ARM等等付出大量授權費，買零件，目的就係華為利用美國技術之產品，建立一個具中國特色之巨型科技企業，同時拚命做研究，希望假以時日，超越美國。目前未得住㗎，宣揚自己威水太過份，反招人忌，現在搞到美英澳紐加日一齊話抵制華為產品，何來好處吖！中國開放改革總設計師係鄧小平，佢老人家老早講咗：『韜光養晦吖嘛』。」
可惜呢！做出一啲成績之後，就覺得「厲害了我的國」，現在招惹歐美日妒忌，排擠，不知如何收拾殘局。日本軟庫在12月份宣佈考慮在日本通訊網絡消除華為設備，以愛立信和諾基亞設備代替更換之。呢樣動作非常昂貴，執行不容易，肯定影響盈利，軟庫可能係受到日本政府以及美英澳紐加互聯網嘅國安情報影響，故此不惜工本消除華為設備。上星期美國參議院司法委員會召開聽證會，被召到參議院發言嘅助理司法部長John Demers及FBI反間諜主管副局長Bill Priestap措詞強硬，指中國用盡方法收集美國網絡情報，華為做生意得到嘅資料，中國政府可隨意取用，對此美國非常關注，要十分小心防範。換言之，美國針對華為，並非貿易戰，而是國安戰，做生意可以有商有量，生意涉及國安，就係複雜政治問題，難以化解！