英國皇室發佈官方聖誕相後，昨日輪到美國總統特朗普（Donald Trump ) 和「Trump嫂」梅拉尼婭（Melania Trump）的聖誕賀卡出籠，兩人好像紙板公仔的甫士造型，令人失笑。
相片是二人日前去congressional ball時拍攝，背後大堆金光閃閃聖誕樹，節日氣氛濃厚，梅拉尼婭更穿了大熱白色閃片裙和老公手拖手並排企。相片本應感覺歡欣又溫暖，但望落卻似剪紙公仔，外國傳媒請來專家分析，推測是相片後期效果做得過火，背景虛化太重手，又將顏色調得太白、太光，令他們好似公仔般彈了出來。雖然官方較原色，但梅拉尼婭覺得未夠好，於是再調一次色放在自己的Ig，可見相片變得偏黃，又將背景再blur。
撰文：林妙萍
球星御用西裝出籠
球星和明星一樣，完全不用為贊助擔心。Boss近日趕在2019年前宣佈繼續「包起」幾支歐洲足球勁旅的西裝look，包括皇家馬德里、熱刺、巴黎聖日耳門等，一眾球員的西裝look新相亦曝光。
2018世界足球先生莫迪歷（Luka Modric）所屬的皇馬，西裝用上象徵球會顏色的海軍藍色，羊毛及彈性物料西裝，配海軍藍、白色斜紋領帶。熱刺今年9月才與Boss合作，靚仔西裝look以tone on tone為概念，深藍西裝、藍恤衫配藍呔，簡約又有時尚感，領隊普捷天奴（Mauricio Pochettino）都會一齊穿。
撰文：林妙萍
更多精采時尚內容，盡在 http://add.appledaily.com。